Сергей Кравцов «Гуманитар өлкәдә дәүләт сәясәте: Җиңү тәрбиясе» Бөтенроссия форумын ачты
Мәскәү педагогика дәүләт университетында 22 октябрьдә «Гуманитар өлкәдә дәүләт сәясәте: Җиңү тәрбиясе» Бөтенроссия мәгариф форумы старт алды. Чараны РФ Мәгариф министры Сергей Кравцов ачты.
Россия Мәгариф һәм фән министрлыгы башлыгы үз чыгышында ассызыклаганча, тәрбия программасының иң мөһим бурычларыннан берсе - укучыларда белем генә түгел, ә гомумроссия гражданлык тәңгәллеген, ватанпәрвәрлек кыйммәтләрен һәм Ватан язмышы өчен җаваплылыкны формалаштыру.
РФ мәгариф министры, дөньяга караш формалаштыруда дәүләт дәреслекләре мөһим роль уйный, дип өстәде. Ул билгеләп үткәнчә, Россия Президенты йөкләмәсе буенча бердәм тарих дәреслекләре әзерләнде, җәмгыять белеме дәреслекләрен эшләү тәмамланып килә. 5-11 сыйныфлар өчен бердәм дәреслекләрнең тулы линейкасы булдырылган инде. Рус теле, әдәбияты һәм әдәби уку буенча мәктәп дәреслекләренең бердәм дәүләт линейкасын булдыру эше дәвам итә.
23 октябрьгә кадәр дәвам итәчәк форум кысаларында пленар утырыш, мәгариф һәм тәрбиянең төрле бурычларына багышланган стратегик сессияләр, РФ Мәдәният министрлыгы вәкилләре катнашында традицион Россия рухи-әхлакый кыйммәтләрен саклау һәм ныгыту мәсьәләләре буенча Россия Мәгариф министрлыгы Советының киңәйтелгән утырышы, түгәрәк өстәлләр узачак. Шулай ук «Образ учителя в кино» студентлар фестивален ачу да булачак.
Форум йомгаклары буенча Россиянең заманча мәгариф һәм мәдәни сәясәтенең мөһим бурычларын нәтиҗәле хәл итүгә юнәлтелгән резолюция кабул ителәчәк һәм фәнни мәкаләләр җыентыгы бастырылачак.