Казанда Мөселман белем бирү оешмалары мөгаллимнәре форумы узды
22-23 октябрьдә Казанда Татарстаннан һәм Россия төбәкләреннән урта һәм югары дини белем бирү оешмалары укытучыларын, мәчет каршындагы курслар мөгаллимнәрен берләштерүче мөселман мәгариф оешмалары мөгаллимнәре Форумы узды. Форум «Россиянең мөселман мәгарифендә традицияләр һәм инновацияләр»дип исемләнгән II Бөтенроссия симпозиумы кысаларында уза. Чара Россия ислам институты һәм Татарстан Республикасы Мөселманнары Диния нәзарәте тарафыннан Ислам мәдәниятенә, фәненә һәм мәгарифенә ярдәм фонды ярдәмендә оештырылды.
Татарстан Республикасы мәгариф һәм фән министры урынбасары Минзәлия Заһри кызы Закирова форумда катнашып, урта һәм югары дини белем бирү оешмалары укытучылары алдында сәламләү сүзе белән чыгыш ясады.
Мәчет алды курслары мөгаллимнәрен милли мәгариф идарәсе җитәкчесе Алсу Сәмигулла кызы Шәрипова сәламләде.