Татарстан галимнәренә 37 фәнни проектка 100 млн сумга якын акча бүлеп бирәләр
Татарстан Республикасы Фән һәм технологияләр фонды (ФНТ) оештырган фундаменталь һәм эзләү тикшеренүләрен финанслауга грант конкурсында җиңүчеләр билгеләнде.
Грантлар конкурсында җиңүчеләрне ФНТ конкурс комиссиясе утырышында сайлап алдылар. Җиңүчеләр арасында - Татарстанның 11 алдынгы югары уку йорты һәм фәнни-тикшеренү институты тикшеренүчеләре бар.
Конкурска 331 гариза бирелгән иде, шулардан комиссия 37 проектны сайлады. Гомумән алганда, Татарстан югары уку йортлары һәм фәнни-тикшеренү институты фәнни хезмәткәрләренә тикшеренү эшләренә барлыгы 100 млн сумга якын акча бүлеп биреләчәк - бер проектка 3 млн сумга кадәр.
Конкурсның максаты - табигый һәм техник фәннәр, медицина, авыл хуҗалыгы, шулай ук социаль һәм гуманитар фәннәр өлкәсендә тикшеренүләр уздыручы фәнни хезмәткәрләргә һәм фәнни төркемнәргә финанс ярдәме күрсәтү.