Сергей Кравцов мәктәпләрдә балаларның сәламәтлеген саклау һәм ныгыту чаралары турында сөйләде
Мәскәүдә РФ Федераль Җыены каршындагы Россия Федерациясе Закон чыгаручылар Советы Президиумы утырышы булды. РФ мәгариф министры Сергей Кравцов гомуми белем бирү учреждениеләрендә балаларның сәламәтлеген саклау мәсьәләләре буенча фикер алышу кысаларында чыгыш ясады. Ул белем бирү тирәлегендә имин, уңайлы шартлар булдыруга игътибарны юнәлтте.
Россия Мәгариф министрлыгы башлыгы билгеләп үткәнчә, ведомство укучыларга уку йөкләнешен киметү буенча системалы эш алып бара. Рособрнадзор һәм Сәламәтлек саклау министрлыгы белән берлектә 2024-2030 елларга белем алучыларга гармонияле, баланслы һәм нәтиҗәле уку һәм тәрбия йөкләнешен формалаштыру буенча чаралар комплексы расланды.
Ведомство башлыгы хәбәр иткәнчә, ел саен мәктәпләрдә укыту һәм тәрбия кирәк-яракларына ихтыяҗны карыйлар, шул исәптән медицина кабинетларын җиһазландыруны да. Ул авыруларны профилактикалауга, сәламәтләндерүгә, физкультура һәм спортка аерым игътибар бирелүенә басым ясады.