Нурлат каникуллар чорында эшләргә яшь көчләр барлый

Нурлат районында быел 550 баланы вакытлыча эшкә урнаштырырга җыеналар. Мәшгульлек үзәгенең быел шулкадәр баланы эшле итү мөмкинлеге бар. Узган елда 140 бала өчен эш урыны булдыру күздә тотылган булган, үзәктәгеләр планны арттырып, 180 баланы эшле иткән. Быел мөмкинлекләрнең күпкә артыграк булуы яхшы, димәк, күбрәк баланы эшле итә алачаклар. Ә бу гаилә бюджетына да ярдәм, үсмерләрне хезмәткә тарту ягыннан да файдалы. Каникуллар чорында эшләргә теләк белдерүчеләр шактый булыр дип фаразлана. Чөнки үзәк аша үсмерләргә бирелә торган матди ярдәм күләме узган елның августыннан артты: хәзерге вакытта ул 1250 сум тәшкил итә. Моннан тыш, минималь хезмәт хакы да ел башыннан югарырак, ә эш бирүчеләр килешү нигезендә балаларга эшләгән сәгатьләреннән чыгып минималь хезмәт хакы түләргә тиеш.