Аксубайда мәктәп укучылары арасында шашка буенча район чемпионаты узды

Аксубайның Яшьләр үзәгендә 5-11 нче сыйныф укучылары арасында Аксубай районының шашка буенча чемпионаты булып үтте.
Киеренке көрәштә беренче урынны Игорь Белов яулады, икенче урында Андрей Липатов, өченчедә – Сергей Новичков. Кызлар арасында Юлия Муртазинага тиңнәр булмады, Диләрә Латыйпова аңардан азга гына калышты, Ильвира Салахова өченче урынны алды.
Турнир нәтиҗәләре буенча, беренче гомумкоманда урынын Иске Кармәт мәктәбе алды, икенче урында Савгач шашкачылары, өченче урын Аксубай лицеена бирелде. Ике көннән соң шул ук яшьтәге укучылар арасында шахмат буенча Аксубай районы чемпионаты старт алды. Монда да янә Игорь Белов җиңүче булды, икенче урынны Илнур Фәйзуллин алды, ә өченчедә – Никита Убейкин. Кызлар арасында Диләрә Латыйпова турнир җиңүчесе булды, Юлия Муртазина исә көмеш медаль яулады. Беренче гомумкоманда урынын яңадан искекармәтлеләр алды, икенче урында Аксубай лицее, 2 нче Аксубай урта мәктәбе өченче урынга чыкты.
Сүз уңаеннан, Яшьләр шахмат лигасының өченче сезоны башланды. Яшьләр үзәгендә һәр якшәмбе көнне 10.00 сәгатьтә турнирлар үтә, аларның нәтиҗәсе буенча җиңүче җәйгә билгеле булачак. Гомуми приз фонды янә арткан: хәзер ул 3 мең сум тәшкил итә, дип җиткерә “Авыл таңнары” газетасы.