Чүпрәледә балалар мәгариф учреждениеләре яңартылачак

2013 ел чүпрәлеләр хәтерендә мәктәпләрне төзекләндерү буенча күп эшләр башкарылган ел буларак та калган. Республикада барган мәктәпләрне төзекләндерү программасы нигезендә, районның Алешкин-Саплык, Хорновар-Шигали, Яңа Чокалы авылларындагы мәктәпләр капиталь төзекләндерелгән. Матак урта мәктәбе, бер түбә астына 25 урынга исәпләнгән балалар бакчасын да урнаштыру өчен, үзгәртеп корылган.
Шланга урта мәктәбенең, Яңа Чүпрәле башлангыч мәктәп-балалар бакчасының түбәсен ремонтлауга, Яңа Борындык башлангыч мәктәбен газ белән ягып җылытуга күчерүгә район бюджетыннан 2 млн. сумнан артык акча тотылган.
Республикада старт алган мәктәпләрне җылы санитария узеллары белән тәэмин итү программасы нигезендә дә районда 2013 елда актив эш башкарылган: алар 14 мәктәптә төзелгән.
Быел исә капиталь төзекләндерүләр Городище, Матак, Яңа Борындык мәктәпләрендә булачак. Иске Элмәле, Иске Дуван, Кече Чынлы мәктәпләре мәктәпкәчә яшьтәге балалар учреждениесен урнаштыру өчен үзгәртеп корылачак.