Тукай телен - “Ана теле” аша

Узган елда сынау рәвешендә гамәлгә ашырыла башлаган «Ана теле» он-лайн мәктәбе хәзер инде тулы куәтенә эшли башлады. 10 мең кулланучыга татар телен өйрәнү мөмкинлеген ачкан бу проект җәмәгатьчелектә зур кызыксыну уятты. Хәзерге вакытта Тукай телен Россия төбәкләрендә яшәүчеләр генә түгел, чит илләрдә гомер итүчеләр дә үзләштерә.
“Ана теле” проекты Татарстан Президенты Рөстәм Миннеханов күрсәтмәсе һәм ярдәме белән 2013 елның 1 февраленнән гамәлгә кертелде. Хөкүмәт шактый өметләр багълаган проектны тормышка ашыруда Татарстанның тел белгечләре, галимнәр, укытучылары зур хезмәт куйды. Бүген инде “Ана теле” татар теленә өйрәтүнең төзек бер системасы булып формалашкан.
Мәгълүм булганча, “Ана теле” структурасы гадидән катлаулыга бару принцибы буенча эшләнгән. Тулы укыту курсы 9 дәрәҗәдән тора, һәр дәрәҗә исә үз эченә 8 бүлекне ала. Биредә теркәлүчеләр татар теленең грамматикасын, лексикасын, фонетикасын өйрәнә, сөйләм телен исә он-лайн режимда алып барылган дәресләрдә чарлый ала. Шулай ук күпсанлы видеофильмнар һәм аудиороликлар ярдәмгә килә. Системада барлыгы 299 видеофильм, 10950 аудиоролик, 6795 фотография урын алган.
Хәзерге вакытта “Ана теле” он-лайн мәктәбендә 10 243 кеше теркәлгән. Быелның февраленнән һәр кеше яңадан теркәлү узарга тиеш. Моңарчы бирелгән лицензияләр алына һәм яңалары бирелә башлый, шөгыльләнмәүчеләр исә төшеп калачак.
Татарстан Мәгариф һәм фән министрының беренче урынбасары Данил Мостафин сүзләренчә, бүгенге көндә төп бурыч - “Ана теле” он-лайн мәктәбен мөмкин кадәр нәтиҗәле итеп куллану. Беренче чиратта, ул балалар бакчалары тәрбиячеләренә татар телен өйрәтүдә актив кулланылачак. Шулай ук татар теле һәм әдәбияты укытучылары өчен зур ярдәмлек була ала. Алар әлеге ресурста урнаштырылган күнегүләрне, аудио һәм видео материалларны үз дәресләрендә файдалана ала.
“Ана теле” проекты кулланучылар тарафыннан да бик уңай кабул ителә. Әйтик, Казанның 39 нчы мәктәбендә рус теле һәм әдәбияты укытучы Людмила Агеева әлеге проекттан актив файдаланып, 10 ай эчендә татар телен өйрәнүдә зур уңышларга ирешә алган. Татар телен өйрәнү хыялын онлайн мәктәп ярдәмендә тормышка ашырган ул. Укытучы бүген телне өйрәнүнең тугызынчы дәрәҗәсенә җиткән инде. Людмила Агеева тулы бер дәрес эшләү мөмкинлеге булмаса, бер бирем булса да башкарам дип сөйләде. “Мин “Ана теле” белән бергә үстем”, - дип сөенеп үз тәэсирләрен уртаклашты ул.