Татар теленнән имтиханны - яңача

Быел барлык тугызынчы сыйныфны тәмамлаучылар татар теленнән мәҗбүри тест үзачак. Татарстан Мәгариф һәм фән министры Энгель Фаттахов әнә шундый эчтәлектәге боерык имзалады.
Бик күпләр моны зур яңалык - беренче тапкыр һәр тугызынчы сыйныф укучысы татар теленнән имтихан тапшыра икән дип кабул итте. Гамәлдә исә, Татарстанда тугызынчыны тәмамлаганда татар теленнән сынау узу инде күптәннән мәҗбүри куелган. Аны туган тел яки дәүләт теле буларак өйрәнгән барлык укучылар да бирә иде. Быел исә сынауның формасы гына үзгәрә.
Татарстан Мәгариф һәм фән министрлыгы яңа – тест рәвешендә татар теленнән имтихан тапшыруны 2 ел элек үк кертте. 2012-2013 елларда укучылар сынауны ни рәвешле (традицион имтихан яки тест) бирәсен үзләре сайлап алырга тиеш иде. 2012 елда яңа форманы 9нчы сыйныф укучыларының 5,5 проценты, ягъни 2014 үсмер сайлаган иде. Узган елны исә апробациядә 23,3 процент (8627 укучы) катнашты. Быел инде үсмерләргә сайлау мөмкинлеге бирелми – тугызынчыларның татар теленнән белемен бары тест рәвешендә генә тикшерәчәкләр.
Мәгълүм булганча, татар теле имтиханы традицион формада узганда туган (татар) телендә белем алган укучылар – инша элементлары белән изложение, рус телендә белем алган татар телле укучылар диктант яки изложение яза иде. Ә рус телле укучылар билетлар буенча сынау тотты. Имтихан тест формасын алгач та биремнәрнең эчтәлеге, шулай ук аларны башкару вакыты укучының татар телен ни рәвешле өйрәнүенә карап билгеләнәчәк. Әйтик, ана телен татар мәктәбендә өйрәнгән укучы имтиханны 3 сәгать 55 минут эчендә тапшырса, рус мәктәбендә белем алучыларга биремнәрне эшләү өчен 2 сәгать 30 минут вакыт бирелә.
Татар теленнән бердәм республика тесты 29 апрель көнне БДИ тапшыру пунктларында узачак.