“Сәләт” яшьләр үзәге “Туган тел” проектын тәкъдим итә

Быел “Сәләт” яшьләр үзәге үзенең 20 еллыгын билгеләп үтә. Үзәкнең җәйге лагерьларында 4 меңнән артык бала ял итәр дип көтелә. Бу хакта бүген “Татмедиа” республика матбугат һәм массакүләм агентлыгында үткән матбугат конференциясендә “Сәләт”нең җитәкчесе Җәүдәт Сөләйманов сөйләде.
“Сәләт”тә 4 профиль сменасы эшли: “Сәләт-тел”, “Сәләт-Раушан”, “Сәләт-санак” һәм “Сәләт-шәхес”. Сәләтле яшьләр өчен үзәк быел тагын “Болгар-туган тел” проектын булдырган. Ул июньнең 23ннән 29ына кадәр Болгар шәһәрендә уздырылачак. Анда Татарстаннан гына түгел, ә Россия төбәкләреннән, Австралия, АКШ, Гарәп Әмирлекләреннән барлыгы меңнән артык катнашучы булыр дип көтелә.
Проект татар мәдәниятен, телен үстерү, татар телен өйрәнү буенча гамәли дәресләр бирүгә һәм балаларда татар теленә карата кызыксыну уятуга юнәлдерелгән. “ Проект кысаларында балалар телне мәктәпләрдәге кебек сүз төзелеше, җөмлә төзелеше буларак өйрәнми. Ул, беренче чираттта, татар телендә сөйләшүгә, аралашуга юнәлдерелгән. Шулай ук биредә яшьләргә кызыклы булган танылган шәхесләр, журналистлар һ.б. белән очрашулар оештырылачак, мастер-класслар үткәреләчәк”, - диде “Сәләт” яшьләр үзәгенең проектлар координаторы Илсур Нәфыйков.
Июльнең 15ннән 23енә кадәр Биләр тарихи-археология музей-тыюлыгында өченче тапкыр “Сәләт” Халыкара яшьләр белем бирү форумы уздырылачак. Анда 5 мең бала катнашачак.
”Сәләт” лагерьларында ял итәргә теләүче балалар быел ике тапкырга күбрәк: 1 урынга хәзер якынча 4 кеше туры килә. Әлбәттә, безнең лагерьларда, берече чиратта, олимпиадалар, бәйгеләрдә җиңгән балалар катнаша. Алар безгә юллаган портфолиолар конкурсы буенча сайланып ала”, - диде Җәүдәт Сөләйманов.
Матбугат конференөиясенә “Сәләт” яшьләр үзәгенең башкарма директоры Тимур Сөйләйманов һәм “Сәләт” клубы президенты Айгөл Габдрахманова да килгән иде. Алар да журналистларның сорауларына җавап бирде.