Татарстан Республикасында беренче тапкыр “Болгар-Туган Тел” профильле сменасы үтә

23 нче июньнән башлап 29 на кадәр Болгар шәһәрендә беренче тапкыр “Болгар-Туган Тел” профильле сменасы үтәчәк. Ул уку-укыту, мәдәни һәм иҗади юнәлешләрдә эшлиячәк, палаткалы лагерь тибында ачык һавада узачак. Форумда төрле олимпиада, фәнни конференция җиңүчеләре, интеллектуаль бәйге, иҗтимагый проект, фестиваль лауреатлары һәм башка күп кенә сәләтле 7-11 нче сыйныф укучылары катнаша алачак. Шунысын да ассызыклап үтәргә кирәк – катнашучылар Татарстан Республикасының мәктәп укучылары гына түгел, ә Россияның башка регионнарыннан да көтелә. Лагерьның программасы татар мәдәниятын, телен үзләштерүгә, татар телен тормыш-көнкүрешнең төрле өлкәләрендә уңышлы файдалануга, өйрәтүгә юнәлдерелгән.
Профильле сменаның төп максаты булып туган телгә хөрмәт тәрбияләү, татар саклап калу проблемасына игътибар бирү, аны чишү юлларын эзләү тора. Моның өчен махсус рәвештә “Татар теле лаборатория” се эшлиячәк.
Лагерьның уку-укыту программасы 3 тармакка юнәлдерелгән:
1. Лингвистика;
2. ММЧ (Массакүләм мәгълүмат чаралары);
3. Мәдәният һәм иҗат.
Катнашучыларны мастер-класслар, тренинглар, “Уңыш тарихы” темасына төрле танылган шәхесләр белән очрашулар көтә.
Лагерьның программасында уку-укыту сессиялары белән беррәттән, күңел ачу чаралары һәм спорт уеннары да булачак. Шулай ук “Нәрсә? Кайда? Кайчан?”, “ШТК” уеннары, психологик тренинглар, шахмат, шашка, арм-спорт, өстәл теннисы буенча турнирлар да планлаштырылган. 28 июнь көнне лагерь кысасында Тукай Форумы да үткәреләчәк. Ул “И Туган Тел, и матур тел...” концерты белән тәмамланачак. Форумда Татарстан Республикасы премьер-министры урынбасары – мәгариф һәм фән министры Энгель Нәвап улы Фәттахов, Татарстан Республикасы яшьләр эшләре һәм спорт министры Рәфис Тимерхан улы Борһанов һәм башка күренекле шәхесләр катнашачак.
Профильле лагерьның оештыручылары булып Татарстан Республикасының мәгариф һәм фән министрлыгы, яшьләр эшләре һәм спорт министрлыгы, Татарстан Республикасының Фәннәр Академиясе, Казан (Идел буе) Федераль Университеты, Татарстан Республикасының Спас районы һәм Сәләт фонды тора.
Хөрмәтле журналистлар! 28 июнь көнне Массакүләм Мәгълүмат чаралары вәкилләре “Болгар-Туган Тел” форумына, тагын да төгәлрәк итеп әйтсәк – Тукай Форумына чакырылалар. Автобус 28 июнь көнне, сәгать иртәнге 8:00, Татарстан Республикасының Фәннәр Академиясе (Бауман урамы, 20 йорт, “Кремль” метростанциясе янында) каршысыннан китәчәк. Кире Казанга кичке 19:00, кичке аш ашаганнан соң кайтып китәчәк. Аккредитация сораулары буенча түбәндәге телефонга мөрәҗәгать итегез: 222-81-93 (Валерия Нестерова).