Болгарда Тукай Форумы узачак

28 июнь көнне Болгарда, “Болгар-Туган Тел” профильле сменасы кысаларында, Габдулла Тукай Форумы узачак. Чарада Татарстан Республикасы Премьер-министры урынбасары – мәгариф һәм фән министры Энгель Фәттахов, ТР яшьләр эшләре һәм спорт министры Рафис Борханов, мәдәният, сәнгать һәм фән эшлеклеләре һ.б. катнашачак.
Исегезгә төшерәбез, 23 июньнән 29 июньгә кадәр Болгар шәһәрендә беренче тапкыр “Болгар-Туган Тел” профильле сменасы үтә. Ул уку-укыту, мәдәни һәм иҗади юнәлешләрдә эшли, палаткалы лагерь тибында ачык һавада уза. Россия һәм Казахстанның төрле регионнарыннан килгән 500 егет-кыз биредә мастер-классларда, тренингларда шөгыльләнә, танылган галимнәр, артистлар, шагыйрьләр, язучылар, спортчылар белән очраша. Форумда төрле олимпиада, фәнни конференция җиңүчеләре, интеллектуаль бәйге, иҗтимагый проект, фестиваль лауреатлары һәм башка күп кенә сәләтле 7-11 нче сыйныф укучылары катнаша. Лагерьның программасы татар мәдәниятын, телен үзләштерүгә, татар телен тормыш-көнкүрешнең төрле өлкәләрендә уңышлы файдалануга, өйрәтүгә юнәлдерелгән.
Профильле сменаның төп максаты булып туган телгә хөрмәт тәрбияләү, татарларны саклап калу проблемасына игътибар бирү, аны чишү юлларын эзләү тора.
Профильле лагерьның оештыручылары булып Татарстан Республикасының мәгариф һәм фән министрлыгы, яшьләр эшләре һәм спорт министрлыгы, Татарстан Республикасының Фәннәр Академиясе, Казан (Идел буе) Федераль Университеты, Татарстан Республикасының Спас районы һәм Сәләт фонды тора.
Хөрмәтле журналистлар! 28 июнь көнне Массакүләм Мәгълүмат чаралары вәкилләре “Болгар-Туган Тел” форумына, тагын да төгәлрәк итеп әйтсәк – Тукай Форумына чакырылалар. Автобус 28 июнь көнне, сәгать иртәнге 8:00, Татарстан Республикасының Фәннәр Академиясе (Бауман урамы, 20 йорт, “Кремль” метростанциясе янында) каршысыннан китәчәк. Кире Казанга кичке 19:00, кичке аш ашаганнан соң кайтып китәчәк. Аккредитация сораулары буенча түбәндәге телефонга мөрәҗәгать итегез: 222-81-93 (Валерия Нестерова).