“Сәлам, дәвам, сәлам, энергия!”

Бүген, 24 июнь көнне, “Болгар – Туган тел” аланының рәсми рәвештә ачылу тантанасы булып узды. Ачылу тантанасында Татарстан Республикасының Мәгариф һәм фән министры урынбасары Светлана Владимировна Гиниатуллина, “Сәләт” фондының генераль директоры, Татарстан Республикасы Фәннәр Академиясе вице - президенты Җәүдәт Шәүкәт улы Сөләйманов, социаль мәсьәләләр буенча Спас районы башлыгы урынбасары, башкарма коммитет җитәкчесе урынбасары Елена Александровна Афоньшина, Татарстан Республикасы Мәгариф һәм фән министрлыгының милли белем бирү бүлеге җитәкчесе Әхмәтҗанова Лилия Марс кызы, “Сәләт” фондының башкарма директоры Тимур Җәүдәт улы Сөләйманов катнашты. Светлана Гиниатуллина балаларны сәламләп, үзенең изге теләкләрен җиткерде: “Сез биредә бик күп дуслар табарсыз, кызыклы шәхесләр белән танышырсыз һәм туган телнең бөеклеген, матурлыгын тагын бер кат аңларсыз дип ышанам”, - диде ул. Җәүдәт Сөләйманов балаларга “Сәлам, яшьләр! Сәлам, дәвам! Сәлам, энергия!”, - дип эндәште. “Сезнең туган телне күңелләрегезгә сеңдерергә, аны өйрәнергә, башкаларга да туган телне үстерү теләген җиткергә бер атна вакытыгыз бар. Әмма бу бер атнаны сез бер ай яшәгән кебек яшәп китәчәксез”, - диде ул.
Тантана Россия Федерациясенең, Татарстан Республикасының һәм “Болгар – Туган тел” аланының әләмнәрен күтәрү белән дәвам итте. Һади Такташ аланы әзерләгән татар халык биюе дә һәркемнең күңеленә хуш килде.
Кичен көн дәвамында барган кастингта сайлап алынган номерлардан төзелгән концерт үтте. Кичке чарадан соң балалар өчен дискотека оештырылды.
“Болгар – Туган тел” аланының өченче көне спорт ярышларына багышланачак. Иртәгә аланнар арасында футбол матчты, волейбол һәм шахмат турниры узуы көтелә.