“Болгар – Туган тел”дә һәрвакыт җылы мохит!

Сменаның өченче көне ахырына якынлаша. Бүгенге көн сәләтле балалар хәтерендә ниләр белән истә калыр соң? Беренче чиратта, әлбәттә, язучы, драматург, публицист, җәмәгать эшлеклесе Рабит Батулла, галим, язучы Әнвәр Хәйри, педагогия фәннәре кандидаты Кадрия Фәтхулова, филология фәннәре докторы хатыйп Миңнегулов, Филология һәм мәдәниятара багланышлар институты доценты Эльвира Димөхәммәтова белән булган очрашулар хәтерләренә уелып калыр. Әлеге шәхесләр үзләренең тормыш тәҗрибәләре белән уртаклашты, сәләтле балаларга тагын бер кат татар теленең бөеклеген аңлатты, аларны кызыксындырган сорауларга бик теләп тулы, төгәл җаваплар бирде.
Әнвәр Хәйри очрашу тәмамлангач та, балалр белән аралашты, сәләтле балалар аның дәресеннән соң янына килеп, кабат-кабат рәхмәт әйтте. “Татар яшьләре үзара татар телендә аралашып, татарча кичәләр оештырып, милли темаларга сөйләшүләр алып барсалар, милләт өчен ул яхшы нәтиҗә бирер иде. Минемчә, мәктәпнең соңгы сыйныфларында укучылар өчен гаилә дәресе кертелсә, яхшы булачак. Фәкать үз милләтеңнән булган кеше белән генә гаилә коруның мөхимлеген, балаларыңның теле “әни” дип ачылуның кирәклеген аңлата торган дәрес булыр иде ул. Сезгә, яңа буын яшьләренә, зур өметләр баглыйм. Әлеге проектны сүндерми, алга алып барырга язсын!”, - дип изге теләкләрен җиткерде галим.
Рабит Батулланың дәресе дә балаларга бик ошады. “Ана теленә мәхәббәт, иң беренче чиратта, гаиләдән килә”, - диде ул. “Әти-әни баласына үз телендә эндәшергә тиеш. Шул очракта гына бала ана теленең бөеклеген аңлый. “Болгар – Туган тел” проектының максаты изге. Милләтебезнең затлы буыны шушы мохиттә тәрбияләнә”, - дип белдерде Рабит ага.
Көннең икенче яртысында балалар өчен Ак мәчеткә сәяхәт оештырылды. Әйдаманнары аларга Ислам дине тарихын сөйләделәр. Сәләтле балалар сәяхәттән бик канәгать калды.
Кичен сәләтле балаларны “Нәрсә? Кайда? Кайчан?” интеллектуаль уены көтә. Көн дәвамында аланнарда әлеге уенда катнашу өчен командалар сайланып алынды.
Кичке аш алдыннан Болгарда кыска вакытлы яңгыр явып үтте. Әмма безне һава торышының еш үзгәреп торуы борчымый. “Болгар – Туган тел” аланында һәрвакыт җылы мохит!
"Сәләт" Медиа-центры