Актаныш районында яңа төзелгән “Умырзая” балалар бакчасы ачылды

11 июль көнне Актаныш районында өч социаль обьект кулланылышка тапшырылды. Ачылу тантаналарында Татарстан Республикасы Премьер-министры Илдар Халиков, Татарстан Премьер-министры урынбасары- мәгариф һәм фән министры Энгель Фәттахов һ.б. катнашты.
Кунаклар иң беренче “Умырзая” балалар бакчасында булдылар. Илдар Халиков яңа балалар бакчасының тантаналы ачылышында катнашты һәм Актаныш балаларын һәм аларның әти-әниләрен бу вакыйга белән котлады. Яңа балалар бакчасы 140 урынга, ягъни 6 төркемгә исәпләнгән. Монда методика кабинеты, тормыш иминлеге нигезләре кабинеты, медицина блогы, физкультура һәм музыка заллары бар.
ТР Премьер-министры Илдар Халиков һәм ТР мәгариф һәм фән министры Энгель Фәттахов “Мәктәпкә җыенырга ярдәм ит” республика акциясендә катнашты. Булачак 1 нче сыйныф укучыларына тантаналы төстә мәктәп портфельләре тапшырдылар.
Кунаклар шулай ук Актаныш авылында “Бөрлегән” шәхси балалар бакчасында булды. Бу балалар бакчасы 2013 нче елдан эшли, 183 кв. м мәйданны били. Ул 3 яшькә кадәр булган балалардан торган ике төркемгә исәпләнгән, һәр төркемдә 15әр бала.
2013-2014 нче уку елында Актаныш муниципаль районында 42 мәктәпкәчә белем бирү йорты эшли, аларга 1560 бала йөри. Район үзәгендә 5 мәктәпкәчә белем бирү оешмасы эшли.
Актаныш муниципаль районына булган эшлекле сәфәре кысаларында ТР Премьер-министры “Бүләк” балалар сәламәтләндерү лагерендә булды. Бу лагерь базасында милли-мәдәни профильнең икенче төбәкара сменасы уза. Илдар Халиков лагерь территориясен карады, балалар белән татар телендә аралашты.