“Сердәш”тә мәктәпкә җыенучыларга бүләкләр тапшырылды

Бүген Авиатөзелеш һәм Яңа Савин районнарында яшәүче беренче сыйныфка баручы 20 балага мәктәп букчалары өләштеләр. Ул “Мәктәпкә әзерләнергә ярдәм ит!” акциясе кысаларында узды.
Әлеге чара “Сердәш” психологик-педагогик ярдәм хезмәте бүлегендә үтте. Бу үзәкнең төп максаты – балаларга һәм аларның ата-аналарына психологик ярдәм күрсәтү. Кечкенәрәк балалар монда, гадәттә, әти-әниләре белән бергә килсә, яшүсмерләр үзләре генә бара. Кагыйдә буларак, сабыйларның уку проблемасы белән еш мөрәҗәгать итәләр икән.
- Бүген бүләкләр тапшыру мизгеленнән кала, ата-аналарга уку елы дәвамында безгә нинди ярдәм буенча килә алганнарын сөйлибез, психолог һәм өстәмә белем бирү педагогы ничек булыша алганын әйтәчәкбез. Гадәттә, ата-аналарны баласының начар билге алуы, начар тәртибе борчый. Мәктәпкә уңай булмаган караш аркасында гаиләдә низаглар килеп чыга да. Бу көндәлек режимның катгый итеп төзелүенә дә бәйле. Бәлки ата-ана сабыена зур таләпләр дә куядыр. Проблемаларның килеп чыгышында балаларның гаебе юк диярлек. Күпчелек очракта ата-аналар баласының үзенчәлеген кабул итә алмый. Шуңа күрә барлык мөрәҗәгатьләр дә ата-анага консультация, киңәш бирүгә кайтып кала диярлек, – дип сөйләде “Сәйдәш” психологик-педагогик ярдәм хезмәте бүлеге җитәкчесе Наталия Сабирова.
Чарага 20 бала чакырылса да, аларның ата-аналары белән беррәттән бертуган эне-сеңелләре дә килгән. Шул сәбәпле, монда килүчеләр көтелгәннән күбрәк булды. Алсу Садретдинованы бу бәйрәмгә Авиатөзелеш районы хакимияте чакыра. Аның 7 яшьлек Рифат исемле улы быел мәктәп бусагасын беренче тапкыр атлап керәчәк. Алсу ханым хәзерге вакытта декрет ялында, ул тагын ике яшьлек улын да тәрбияли.
Авиатөзелеш һәм Яңа Савин районнары администрациясенең балалар һәм яшьләр эшләре бүлеге җитәкчесе Татьяна Ахмерова:
- Былтыр 400дән артык мәктәп букчасы тапшырсак, быел да кайбер категориядәге балаларга алар биреләчәк. Барысы да хәйрия акчаларына алынган. 1 сыйныфка баручыларга – эчендә уку кирәк-яраклары булган букча, ә 2-11 сыйныфларга мәктәп кирәк-яраклары яки спорт/мәктәп формасы (кайсысы кирәгенә карап) бирелә, – диде.
Быел “Бердәм Россия” партиясе белән берлектә уздырыла торган әлеге чарада Авиатөзелеш һәм Яңа Савин районнарында яшәүче беренче сыйныфка баручы балаларга – 450 мәктәп букчасы, 2-11 сыйныф укучыларына 72 канцелярия товарлары җыелмасы, 72 спорт формасы комплекты тапшыралачак. Шулай ук Украинадан килгән ике гаиләгә дә ярдәм итәчәкләр.
Булачак беренче сыйныф укучылары “Сердәш” психологик-педагогик ярдәм хезмәте бүлегендә бүләкләрне алу белән беррәттән кызыклы викторинада да катнашты. Алар Буратино, Белмәмеш, Фея белән бергә күңел ачты.