Наркотик кулланучы укучыларга “ау” башлана

Сентябрь аеннан мәктәп укучыларын, гадәттәгечә, наркотик һәм психотроп матдәләр куллану-кулланмауга тикшерә башлыйлар. Мондый кисәтү чараларына быел республика бюджетыннан 10 миллион сум акча бүленгән.

Республикабызда наркоманияне кисәтү өчен үткәрелә башлаган тикшерүләр менә инде байтак ел бәхәсле мәсьәләләрнең берсе. Белүебезчә, Татарстан Россиядә мондый тәҗрибәне беренчеләрдән кертеп җибәрде. Шуңа да белем йортларында табиблар үткәргән тикшерүләрнең хокуклымы-юкмы икәне турында сораулар бик еш туып тора.

Белүебезчә, республикабызда наркотик куллану-кулланмауга тестлар ихтыяри-мәҗбүри рәвештә үткәрелә. 15 яшькә кадәрге үсмерләрне тикшерү өчен ата-ана ризалыгы таләп ителә, өлкәнрәкләрнең үз ризалыгы сорала. Әмма еш кына тикшеренергә теләмәгәннәрне имтиханга кертмибез, зачетларыгызны бирә алмаячаксыз дип куркыталар.

Быелдан исә мәктәп укучылары, училище, техникум һәм югары уку йортлары студентлары арасында наркотик куллану-кулланмауга тикшерүләр алдан хәбәр итмичә үткәрелә башлый. Агымдагы елның гыйнварында Татарстан Мәгариф һәм фән министрлыгы оператив штабы тарафыннан наркотикларга тестларны уку йортларына алдан хәбәр салмыйча үткәрү турында карар кабул ителгән (моңа кадәр табиблар уку йортына килү теләге турында 24 сәгать алдан хәбәр итәргә тиеш иде). Наркологлар сүзләренчә, тикшерү үткәрү турында алдан кисәтеп кую тиешле нәтиҗәләр бирми. Әйтик, наркотикларга тест үтәргә теләмәгән укучы бу көнне мәктәпкә генә килми кала. Нәтиҗәдә, тикшерелгән меңләгән укучы арасында берничә наркотик кулланучы гына ачыклана.

Беренчеләрдән булып республика наркологик диспансеры белгечләре наркоман-укучылар табылган уку йортларының ишеген шакыячак.

- Укучы тест узудан баш тарткан очракта, бу мәсьәлә Татарстан Мәгариф һәм фән министрлыгы каршындагы оператив штабта каралачак. Сөенечкә, соңгы алты елда баш тартучылар булмады, - ди балалар наркологиясе буенча наркологик диспансерның баш табиб урынбасары Степан Криницкий.

Мәгълүм булганча, укучылар арасында наркотик куллану-кулланмауга тикшерүләр 2006 елдан башлана. 8 ел эчендә 1 002 595 кеше наркологлар күзе аша узган, 1 151е наркотик куллануда тотылган.