“Авыл укытучысы-2014” бәйгесенең җиңүчесе билгеле

Укытучылар өчен чыга торган “Мәгариф” журналы оештырган «Авыл укытучысы – 2014» бәйгесе республика авыл мәктәпләрендә эшләүчеләр арасында зур кызыксыну уятты. Конкурсның беренче этабында 500дән артык кеше катнашса, соңгы – хәлиткеч этабына шуларның унысы гына үтте.
Мәгарифне үстерү институты бинасында узган финалда алар үз фәннәре буенча мастер-класс күрсәтте. Укытучыларның эшләрен мәртәбәле жюри әгъзалары бәяләде. Рәмзия Бәшәрова, Кукмара районының Г.Гарифуллин исемендәге Ядегәр урта мәктәбенең тарих һәм җәмгыять белеме укытучысы (I урын), Илсөяр Җамалиева, Алексеевск районы 2 нче Алексеевск урта мәктәбенең татар теле һәм әдәбияты укытучысы (II урын), Лилия Шакиртянова, Азнакай районы Актүбә эшчеләр поселогындагы 3 нче урта мәктәпнең рус теле һәм әдәбияты укытучысы (III урын) җиңүчеләр дип табылды. «Мәгариф» журналының баш мөхәррире Илдар Миргалимов йомгаклау сүзе белән чыкты, әлеге бәйгедә катнашучыларга рәхмәт хатлары тапшырды.