Татарстанда туган телләр һәм әдәбиятлар буенча мәктәп укучылары олимпиадаларының йомгаклау этабы узды

2014 елның 18-20 декабрендә Казанда мәктәп укучыларының чуаш, мари, мордва һәм удмурт телләре һәм әдәбиятлары буенча республика олимпиадаларының йомгаклау этабы узды. Олимпиадаларда 70тән артык мәктәп укучысы катнашты. Жюри карары буенча чуаш теле һәм әдәбияты буенча олимпиадада Апас, Баулы, Чирмешән районнары һәм Түбән Кама шәһәре укучылары җиңеп чыкты, мари теле һәм әдәбияты буенча – Актаныш һәм Әгерҗе районнары укучылары, мордва теле һәм әдәбияты буенча – Бөгелмә һәм Тәтеш, удмурт теле һәм әдәбияты буенча – Әгерҗе һәм Кукмара районнары укучылары беренчелекне яулады. Республика олимпиадалары Чувашия һәм Удмуртия, Марий Эл һәм Мордовия республикалары укытучылары, фәнни һәм фәнни-педагогика хезмәткәрләре әзерләгән биремнәр буенча уздырылды. Республика олимпиадасының фәнни-методик комиссияләрендә эшләү өчен әлеге республикалардан килгән галимнәр - тел белгечләре катнашты. Татарстан Республикасы Мәгариф һәм фән министрлыгы белән Чувашия һәм Удмуртия, Марий Эл һәм Мордовия республикалары мәгариф һәм фән министрлыклары арасындагы хезмәттәшлек турындагы килешүләр нигезендә республика олимпиадаларында җиңгән укучылар төбәкара олимпиадаларда катнаша.