Алабуга шәһәрендә Габдулла Тукай мирасына багышланган фәнни-гамәли конференция узды

1000 еллык тарихы булган Алабугада Габдулла Тукайга һәйкәл ачылган көн тарихка кереп калыр. Тантаналы вакыйгада Татарстан Республикасының Габдулла Тукай һәм Муса Җәлил премияләре лауреаты, Россия Федерациясенең һәм ТР атказанган мәдәният хезмәткәре, язучы, шагыйрь Разил Вәлиев, Алабуга муниципаль районы башлыгы урынбасары Зөлфия Сөнгатуллина, ТР атказанган мәдәният хезмәткәре, Татарстан Язучылары берлеге әгъзасы, “Мәйдан” журналы директоры, язучы Вахит Имамов, ТР атказанган мәдәният хезмәткәре, Татарстан Язучылары берлеге рәисенең урынбасары, язучы Факил Сафин, Алабуга районы “Ак сакаллар” берлеге рәисе Рафик Мәхмүтов, Казан (Идел буе) федераль университеты галимнәре, мәдәният һәм сәнгать көллияте укытучылары, милли мәгариф хезмәткәрләре, белем бирү оешмалары җитәкчеләре, татар теле һәм әдәбияты укытучылары, мәктәп укучылары, шәһәр халкы һәм массакүләм матбугат чаралары вәкилләре катнашты.
Чараның дәвамы булып, сөекле шагыйребез Габдулла Тукайның иҗади мирасын өйрәнү, яшь буынга рухи-әхлакый тәрбия бирүдә шагыйрьнең шигырьләрен пропагандалау максатыннан 1 нче татар гимназиясендә “Яшь буынга белем һәм тәрбия бирүдә Габдулла Тукай мирасы” темасына республикакүләм фәнни-гамәли конференция үзенең эшен башлап җибәрде. Килгән кунакларны гимназиянең ишек төбеннән үк Тукайның Шүрәлесе, Су анасы, күбәләкләре каршы алды. Һәркем үзен әкият дөньясында дип хис итәрлек иде. Ә инде конференция башланыр алдыннан сәхнәгә “Кечкенә Апуш” чыккач, күпләрнең күзләренә яшь килде. Тукайның Уральскига килгәч Җаек мәдрәсәсендәге беренче көнен сәхнәләштергән укытучылар һәм укучылар конференция эшенә юнәлеш биреп чараны башлап җибәрделәр.
Фәнни-гамәли конференцияне Вахит Имамов алып барды. Башкарма комитет җитәкчесенең беренче урынбасары Лилиана Альянс алабугалыларны Тукай һәйкәленең ачылуы белән котлады, конференция эшенә уңышлар теләде. “Алабуга муниципаль районы белем бирү оешмаларында Г.Тукай мирасыннан файдалану” темасына Алабуга муниципаль районы мәгариф идарәсе башлыгы Ривал Зарипов чыгыш ясады. Шагыйрьгә багышлап республика һәм район күләмендә нинди конференцияләр, бәйгеләр үткәрелүен әйтте, аларда Алабуга укытучылары һәм укучыларының бик актив катнашуларын үзенең презентациясе белән дәлилләде.