Колледж-техникум лидерлары форумда очраша

Татарстанда югару уку йортларында укучыларга гына түгел, урта һөнәри белем алучыларга да игътибар бирелә. Моның шулай икәнен колледж-техникум студентлары өчен уза торган Студентлар үзидарәсе лидерларының I Республика форумы дәлилли.
6-8 февраль көннәрендә уза торган әлеге чарага студентлар үзидарәсе органының рәисләре җыелды. Форумны “Россия яшьләр бердәмлеге” рсепублика оешмасы Татарстанның Мәгариф һәм фән министрлыгы белән берлектә уздыра.
Өч көн дәвамында катнашучылар урта һөнәри белем бирү учреждениеләре өчен мөһим мәсьәләләрне тикшереп, аларны чишү юлларын эзли. Дискуссияләр билгеле бер темаларга багышлана. Алар арасында иң әһәмиятлеләре булып студентлар үзидарәсе гомум мәсьәләләре, патриотик тәрбия, спорт, фән, социаль сфера, мәдәни-массакүләм эшчәнлек, мәгълүмати яктырту темалары тора. Моннан тыш махсус белем бирү программасы да каралган. Форумның төп вакыйгасы – йомгаклау утырыш. Анда катнашучыларның тәкъдимнәре кабул ителәчәк. Алар, үз чиратында, Татарстан Рсепубликасының VIII Студентлар конгрессының резолюциясенә кертелергә мөмкин.