Яшь лидерлар ТРда талантлар белән стратегик идарә программасын гамәлгә ашыру идарәчеләре төркеменә керә ала

Татарстан Республикасының яшь лидерлары, иң яхшы профессионаллары “2015-2020 нче елларда ТРда талантлар белән стратегик идарә” дәүләт программасын гамәлгә ашыру белән идарә итүчеләрнең проектлау төркеменә керергә һәм конкурс аша сайлап алуда катнашырга чакырыла.
Әгәр сез Россия Федерациясе һәм Татарстан Республикасы алдында торган инновацион бурычларны һәм мәсьәләләрне хәл итүдә үз көчегезне сынап карарга әзер булсагыз, команда белән идарә итү һәм ресурларны бүлгәләү, проект төркемнәре эшенең нәтиҗәлелеген тәэмин итәргә сәләтле икәнсез, конкурс нигезендә сайлауга рәхим итә аласыз.
Бәйгедә катнашу тәртибе түбәндәгечә: 2015 нче елның 16 нчы февраленә кадәр резюме һәм заявка җибәрергә кирәк. Экспертлар төркеме резюме белән танышып, 18 нче февральдә конкурс сайлавының икенче этабында катнашу өчен чакырылган кандидатлар исемлеген игълан итәчәк. 20 нче февральдә сайлап алуның көндезге этабы узачак. Үз мөмкинлекләреңне яхшылап күрсәтү һәм дәүләт программасы белән танышу өчен әлеге этап эшлекле уен форматында узачак. Катнашучыларның эшен ТР хакимият органнары, әйдәп баручы предприятиеләр һәм федераль экспертлар берлеге вәкилләре күзәтеп бәя бирәчәк. Этап йомгаклары буенча лидерлар билгеләнеп, сайлап алуның йомгаклау этабына чакырылачак, шулай ук 21 нче февральдә килешүләр имзаланачак.
Аннан соң, якыннанрак танышу максатыннан,әңгәмә корылачак. Эш сессиясе форматында сайлап алу лидерлары аерым бер юнәлеш кысаларында мөмкинлекләрен һәм потенциалны билгеләячәк. Гамәлгә куючылар белән сөйләшүләр үткәреләчәк, алдагы гамәлләр планы эшләнәчәк.
23 нче февральдә сайлап алу җиңүчеләре игълан ителәчәк, алар “2015-2020 нче елларда ТРда талантлар белән стратегик идарә” дәүләт программасын гамәлгә ашыру белән идарә итүчеләрнең проектлау төркеменә кертеләчәк.
Җиңүчеләрнең шәхсиән һәм профессиональ үсеше өчен иң яхшы шартлар тудырылачак. Җиңүгә ирешмәсә дә, эшкә омтылышын һәм югары нәтиҗәләр күрсәткән кандидатларга сайлап алу процессында дәүләт программасын гамәлгә ашыру кысаларында стажировка тәкъдим ителәчәк.
Ачык вакансияләр белән utalents.ru сайтында танышырга мөмкин, дип хәбәр итә оештыручылар.