Сарманда эшче кадрлар һәм авыл хуҗалыгы белгечләре әзерләү буенча ресурс үзәк ачылды

16 февральдә Сарман аграр көллияте базасында югары квалификацияле эшче кадрлар һәм авыл хуҗалыгы тармагы предприятеләре өчен белгечләр әзерләү буенча һөнәри белем бирү ресурс үзәге ачыла. Ачылу тантанасында Татарстан Республикасы Дәүләт Советы Рәисе Фәрит Мөхәммәтшин, Татарстан Республикасы Премьер-министры урынбасары - мәгариф һәм фән министры Энгель Фәттахов катнашты.
Узган ел башында, “2014-2020 елларга Татарстан Республикасында һөнәри белем бирүне үстерү” программасы чараларын гамәлгә ашыру максатында, Сарман аграр көллиятенә тармак ресурс үзәге статусы бирелде.
Әлеге проект кысаларында механикалаштыру, электрлаштыру, авыл хуҗалыгын автоматлаштыру, гидравлика, слесарьлык эше һәм стандартлаштыру, метрология һәм микробиология лабораторияләре, юл йөрү кагыйдәләре, трактор һәм автомобиль кабинетлары тулысынча төзекләндерелде һәм җиһазландырылды. Юл йөрү кагыйдәләрен практик үзләштерү һәм автомобиль, авыл хуҗалыгы техникасы төзелешен өйрәнү өчен махсус тренажерлар кайтартылды. Алар хәзерге вакытта файдаланылышта.