Әлмәттә студентлар хоры фестиваленең зональ туры узды

12 нче март көнне Ф.З. Яруллин исемендәге Әлмәт музыка көллиятендә Бөек Җиңүнең 70 еллыгына багышланган студентлар хоры фестиваленең зональ туры узды. Фестиваль “Татарстан – яңа гасыр” республика иҗтимагый хәрәкәте инициативасы белән яшь буында патриотик хисләр уяту һәм халкыбызның данлыклы тарихына ихтирам тәрбияләү максатыннан үткәрелә. Зональ турда Әлмәт дәүләт муниципаль хезмәт институты, Ф.З. Яруллин исемендәге Әлмәт музыка көллияте һәм Лениногорск музыка-сәнгать педагогика көллияте хорлары катнашты.
Конкурсның жюри әгъзалары: РФ һәм ТР атказанган сәнгать эшлеклесе, Н.Г. Җиһанов исемендәге Казан дәүләт консерваториясенең хор дирижерлау кафедрасы мөдире, профессор В.Г. Лукьянов; ТР атказанган сәнгать эшлеклесе, Казан консерваториясенең опера студиясе җитәкчесе, профессор Ә.И.Җаппарова; Казан дәүләт мәдәният һәм сәнгать университетының вокаль-хор иҗаты бүлеге мөдире, профессор В.Д. Булгаков; “Татарстан – яңа гасыр” республика иҗтимагый хәрәкәте сәяси советы башкарма комитеты рәисе, ТР атказанган мәдәният хезмәткәре А.Г. Тарханова; Әлмәт дәүләт муниципаль хезмәт институты ректоры, “Татарстан – яңа гасыр” республика иҗтимагый хәрәкәте Татарстанның көньяк-көнчыгыш зонасы координацион советы рәисе И.Р. Сәлахов.
Конкурс нәтиҗәләре буенча 3 хор да 29 апрельдә узачак финалда катнашу хокукына ия булды.