«Сәләт» IV Халыкара уку-укыту яшьләр форумы Татарстанның 22 районыннан делегацияләр кабул итте

Кичә, «Сәләт» IV Халыкара уку-укыту яшьләр форумының 3нче көнендә, Алексеевск районы Биләр җирендәге лагерь кабат Татарстанның 22 районыннан делегацияләр кабул итте. Аксубай, Әлки, Баулы, Чүпрәле, Алабуга, Кама Тамагы, Мамадыш, Минзәлә, Мөслим, Сарман, Тәтеш, Тукай, Теләче һәм Чирмешән районнарыннан килгән сәләтле балалар төрле кызыклы мастер-класслар, тренингларда катнашу бәхетенә ирештеләр. Әлеге дәресләрнең саны шактый күп, төгәлрәк әйтсәк, - 22! Һәр бала күңеленә ошаган дәрескә барып белем һәм тәҗрибә туплый алды. Темалары да күптөрле: шәхси уңыш һәм нәтиҗәлелек, уңыш һәм карьера белән идарә итү, фән һәм IT, кул эшләре.

Татарстан Республикасы Дәүләт Советының икътисад, инвестиция һәм эшмәкәрлек комитеты рәисе Рафис Борһанов Форумга бик теләп килгәнен белдерде. «Форум, былтыргыга караганда, тагын да зурайган кебек. Биредә балаларның бер-берсе белән аралашып, белемнәре белән уртаклашуын хуплыйм. Кәеф күтәреп, шатланырга телисез икән — бирегә рәхим итегез! Әлеге Форум республикабыз өчен бик кирәк. Монда безнең киләчәгебез үсә, Татарстанның булачак белгечләре бирегә җыелганына шикләнмим. Балалар Форумга бер-берсе белән аралашып, күңел ачарга гына түгел, тәҗрибәләре белән уртаклашып, яңалык табар өчен килә. Әлбәттә, балаларның татар телендә аралашуы - бик күркәм гамәл. Үз тамырын, тарихын белмәүче кеше безнең киләчәгебезне төзи алмый», - дип фикерләре белән уртаклашты депутат.

“ТАИФ” компаниясе генераль директоры урынбасары Гүзәлия Сафина да бүген бездә кунакта булды, тәҗрибәсе белән уртаклашты. «Сез әле яшь. Төп максатыгыз уку, белем алу булсын. Ә планнарыгызны тормышка ашырыр өчен без сезгә һәрвакыт ярдәмгә килергә әзер!» – диде ул.

Галиәсгар Камал исемендәге Татар дәүләт академия театры директоры Илфир Якупов үзенең уңыш серен ачты. «Күңелемә ошаган шөгыльне тапкач – бар максатларыма да ирештем», - диде ул гади генә.


«Нәрсә? Кайда? Кайчан?» телевизион уены магистры Ровшан Аскеров үзенең төп уңышларын барлады. «Һәр ир-атның төп бурычы – әйбәт ата һәм ир була белүдә. Мин моңа ирештем дип саныйм», - ди ул.

Аерым алганда, биредә балалар кул эшләр белән дә шөгыльләнә алдылар. Мисалга, читекче Илдар Шәйхетдиновның мастер-классы дистәләгән баланы үзенә җыйды. «Балаларга минем һөнәрем ошавын күреп бик сөендем. Аларны әле әби-бабаларыбызның үткәне дә кызыксындыра: яшәү рәвеше, кием-салым, кәсепләре хакында сорау артыннан сорау яудыралар. Мин дә читек тегәргә үзлектән генә өйрәнгән кеше. Һөнәремне балаларга тапшырып калдыра алуыма бик шатмын!» - дип, хис-кичерешләре белән уртаклашты Илдар абый.

«Сәләт» телләр мәктәбе җитәкчесе Нариман Димөхәммәтов кытай һәм инглиз телләре хакында гәп куертты. «Сәләт»тә инде әлеге ике тел дә ел ярымнан артык укытыла», - диде Нариман.

Ралли-кросс буенча 3 мәртәбә дөнья чемпионы Тимур Тимерҗанов үзенең уңыш формасын балаларга җиткерде: «Беренче тапкыр килеп чыкмаска мөмкин... Икенче тапкыр эшләп карарга курыкмагыз!» – дип киңәшен дә бирде.

Ә кичке чара итеп «Нәрсә? Кайда? Кайчан?» уены сайланылган иде. Аны Ровшан Аскеров уздырды. 3нче урынны «Сәләт-Бөгелмә», 2нче – «Сәләт-Гайрәт», ә иң югары баскычны, 1нче урынны, «Сәләт-Раушан» аланы яулады.

Уку-укыту программасы бүген дә, иртәгә дә үз эшчәнлеген дәвам итәчәк. Форумга мәртәбәле кунаклар, фән белгечләре, мөгаллимнәр килүе көтелә. Иң кайнар яңалыкларны сез selet.biz сайтында һәм рәсми төркемнәрдә күзәтеп бара аласыз.

Белешмә.
Сәләт-2015 Форумы 2012 елның 7-12 июль көннәрендә Татарстан Республикасы Президенты Рөстәм Нургали улы Миннеханов инициативасы ярдәмендә Халыкара уку-укыту Форумы статусын ала. Елдан-ел әлеге Форум 5 меңнән артык сәләтле балаларны җыя.

Быелгы Форумда Татарстан Республикасының төрле районнарыннан, Россия төбәкләреннән һәм чит илдән 3,5 меңнән артык бала катнаша. Алар төрле республика күләмендә уздырылган олимпиадаларда, иҗади конкурсларда, фәнни конференцияләрдә катнашып җиңү яулаганнар. Форумга чакырылган кунаклардан танылган шәхесләр, педагоглар, гыйльми даирәләр, язучылар, сәнгать әһелләренең саны - 400дән, яшьләр оешмалары - 200дән, Сәләт ветераннары - 300дән артык.