КДМУ һәм 179 нчы мәктәп махсуслаштырылган медицина классына укучылар җыя

Казан дәүләт медицина университеты һәм Казанның Бондаренко урамында төзелгән яңа 179 нчы мәктәп 2015-2016 уку елына махсуслаштырылган 8 нче медицина сыйныфына укучыларны җыю турында игълан итә.

Күп профильле мәктәптә бала шәхесе үсеше өчен уникаль мөмкинлекләр тудырылган. Укучылар үзидарәсен үстерү өчен бизнес-үзәкне, җәмәгатьчелек белән элемтәләр буенча үзәкне, фәнни тикшеренүләр үзәген, социаллаштыру һәм күнекмәләр алу өчен мәгълүмати үзәк, лаборатор сынаулар уздыру өчен гамәли тәҗрибә үзәген булдыру планлаштырыла.

Моннан тыш, биредә фотостудия, киностудия һәм мәктәп типографиясе эшләячәк. Мәктәптә тренажер зал, бассейн, кече һәм олы спорт заллары, хореография залы, ике актлар залы һәм күпсанлы атриум-зоналар бар.

Медицина классында белем бирү процессы Казан дәүләт медицина университеты белән хезмәттәшлек турындагы килешү нигезендә алып барылачак.

Медицина юнәлешендәге сыйныф (8 нче класс) гомуми урта мәктәпнең 7 нче сыйныфын тәмамлаган укучыларның теләге буенча конкурс нәтиҗәсендә формалаштырыла. Укучыларның гаризалары нигезендә 25 кешедән дә ким булмаган класслар булдырылачак.

Профильле әзерлек программасына “Медицина белән танышу” (24 сәгать) фәне кертелгән, ул якшәмбе саен КДМУның медицина тарихы музее, нормаль анатомия кафедрасының анатомия театры, патологик анатомия кафедрасы музее, нормаль физиология кафедрасы музее һәм башкалар белән танышуны күздә тота.

Шулай ук, программа кысаларында Гамәли күнекмәләр үзәгенә, КДМУның стоматология сырхауханәсенә һәм республиканың әйдәп баручы клиникаларына бару планлаштырылган.

Махсуслаштырылган 8 нче сыйныфка икенче потокка җыю 18 нче августта 17 сәгать 30 минутта КДМУның Уку-лаборатор комплексы бинасында узачак. Ул Бутлеров урамы, 49б йорт адресы буенча урнашкан. Элемтә өчен телефоннар: 8 (843) 236-13-51 һәм 8-917-868-18-30.

Укучыларның медицина юнәлешендә белем алуының төп максатлары – укучыларны урта һәм югары медицина белемен алуга әзерләү; укучыларның гигиена тәрбиясе; укучыларның авыруларны карау буенча күнекмәләр алуы.

Медицина профильле сыйныфларында уку (8 нче сыйныфтан 11 нче сыйныфка кадәр) яшүсмерләргә психологик үзенчәлекләр, физик һәм башка шәхси мөмкинлекләрне исәпкә алып, табиб һөнәрен сайлауда аңлырак булырга ярдәм итәчәк.

Программаны уңышлы узган 11 нче медицина сыйныфын тәмамлаучылар КДМУга кергәндә өстенлекләргә ия булачак.