Казан укучысы биология буенча халыкара олимпиадада алтын медаль яулады

Казан шәһәрендәге “СОлНЦе” урта мәктәп-интернатының унберенче сыйныфын тәмамлаучы Никита Алкин дөнья буенча мәктәп укучылары арасында биология фәненнән иң яхшы нәтиҗәләр күрсәтеп Халыкара олимпиададан алтын медаль алып кайтты. Биология фәне буенча Халыкара олимпиада 2015 елның 12-19 июлендә Даниянең Оркус шәһәрендә узды. Биредә дөньяның төрле почмакларыннан биология фәнен иң яхшы белүче мәктәп укучылары җыелган иде.
Никита Алкинның моңа кадәр дә биология фәне буенча Бөтенроссия мәктәп укучылары олимпиадаларының региональ һәм йомгаклау этапларында җиңүче булганы бар, ә 2014-2015 уку елында Никита биологии фәне буенча мәктәп укучыларының XXXI Бөтенроссия олимпиадасында унберенче сыйныф укучылары арасында абсолют җиңүче булды. Моннан тыш, 2015 елның апрель аенда Никита Мәскәү дәүләт университетының “Покори Воробьёвы Горы” дип аталган Ачык олимпиадасында унберенче сыйныф укучылары арасында биология фәне буенча җиңүче дип табылды. Никита 2013 елдан бирле Казан шәһәренең Вахитов районында урнашкан “СОлНЦе” мәктәбендә укый. Биология фәненнән Никита белән сәләтле балалар белән актив эшләүче Клочкова Светлана Александровна шөгыльләнә.