Татарстанның 4нче сыйныф укучыларының математика, рус теле, әйләнә-тирә дөнья, уку буенча йомгаклау эшләре турында

Татарстанның 4нче сыйныф укучылары математика, рус теле, әйләнә-тирә дөнья, уку буенча йомгаклау эшләрен уңышлы башкарган. Бу хакта бүген ТР Министрлар Кабинетында уздырылган брифингта ТР Премьер-министры урынбасары – ТР мәгариф һәм фән министры Энгель Фәттахов хәбәр итте.
Министр сүзләренә караганда, хәзерге вакытта Татарстанда башлангыч, төп һәм урта мәктәптә белем сыйфатын бәяләү системасы булдырылган. Башлагыч мәктәптә ул 2 төп мөһим өлештән гыйбарәт. Иң элек балаларның белемнәре мәктәпкә кергәндә бәяләнә. Аерым алганда, 1нче сыйныф укучыларының белем дәрәҗәсе уку елы башында (сентябрь) һәм ахырында (май) тикшерелә. “IPIPS” дип исемләнгән әлеге халыкара тикшеренү Бөекбритания тәҗрибәсе буенча үткәрелә һәм башлангыч сыйныфлар укытучыларының, шулай ук балалар бакчалары тәрбиячеләренең эшенә вакытында төзәтмәләр кертү мөмкинлеге булдыра”, – дип сөйләде Энгель Фәттахов.
Тикшеренүләрнең 2нче өлеше исә башлангыч мәктәпне тәмамлаганда башкарыла. Аның буенча уку елы дәвамында ТР Мәгариф һәм фән министрлыгы 4нче сыйныфларда чит ил һәм татар телләре буенча диагностик тест үткәргән, шулай ук яңа мәгариф стандартлары буенча белем алган башлангыч мәктәпне тәмамлаучыларның рус теле, математика, әйләнә-тирә дөнья фәннәреннән белем дәрәҗәсен тикшергән.
“Агымдагы уку елының апрелендә Татарстанның барлык белем бирү оешмаларында, Икътисад югары мәктәбе белән берлектә , мониторинг тикшеренүләре үткәрелде. 4нче сыйныф укучылары математика, рус теле, әйләнә-тирә дөнья, уку һәм төркем проектлары буенча йомгаклау эшләре башкарды”, – дип сөйләде министр үзенең чыгышында.
Ул билгеләп узганча, әлеге мониторинг биремнәре, белем-күнекмәләрне үзләштерү дәрәҗәсен ачыклаудан бигрәк, укучыларның дәресләрдә алган белем-күнекмәләрдән төрле очракларда нәтиҗәле итеп файдалана белү сәләтен бәяләүгә юнәлтелгән. Мониторингта республиканың 35 меңнән артык 4нче сыйныф укучысы катнашкан.
Энгель Фәттахов әйтүенчә, Татарстан укучыларының нәтиҗәләре Россиянең башка төбәкләрендә белем алучы яшьтәшләренең уртача нәтиҗәләреннән 10-15 процентка югарырак.
Министр китергән саннардан күренгәнчә, ТРда башлангыч мәктәпне тәмамлаучыларның 94 проценты математика һәм рус теле буенча яңа федераль дәүләт мәгариф стандартлары таләпләре кысаларына сыешкан. Әйләнә-тирә дөнья буенча бу сан 93 процент, уку буенча 95 процент һәм проект эшчәнлеге буенча 92 процент тәшкил иткән.
Шул ук вакытта 4нче сыйныф укучыларының 5-8 проценты 5нче сыйныфка 1 яки берничә фән буенча әзерлекнең база дәрәҗәсе таләпләрен үтәмичә күчкән.
“Республиканың барлык мәктәпләре һәр сыйныф һәм һәр укучы буенча нәтиҗәләрне алды. Бүген укытучылар һәм методик хезмәткәрләр алдында аларны җентекләп анализлау бурычы тора”, – дип билгеләп узды ТР мәгариф һәм фән министры. Әлеге нәтиҗәләрне исәпкә алып, укучыларның шәхси белем алу траекториясен билгеләү күздә тотыла.