Рөстәм Миңнеханов Буада яңа балалар бакчасы ачты

ТР Президенты вазифаларын вакытлыча башкаручы Рөстәм Миңнеханов бүген эш сәфәре белән республиканың башта Апас, аннары Буа муниципаль районнарында булды. Буада Татарстан лидеры 140 урынга исәпләнгән “Светофорик” балалар бакчасын тантаналы ачу чарасында катнашты. Ике катлы һәм подвалы да булган әлеге мәктәпкәчә белем бирү учреждениесенең музыка һәм физкультура заллары, методик, медицина, процедуралар ясау кабинетлары, ризык әзерләү блогы, кер уу бүлмәсе, территориясендә спорт-уен мәйданчыгы, шулай ук юл йөрү кагыйдәләрен өйрәнү мәйданчыгы бар.

Рөстәм Миңнехановка биредә мәктәпкәчә яшьтәгеләрнең рәсем ясауда, интеллектуаль, музыкаль яктан һәм биюдә мөмкинлекләрен-сәләтләрен үстерүгә юнәлтелгән өстәмә белем бирү хезмәтләре күрсәтү ниятләнүе турында сөйләделәр. Р.Миңнеханов һәм аны озата барган вазифаи затлар яңа бинаны күздән кичерде, балалар өчен салынган яңа учреждение турында аларга “Светофорик” бакчасы мөдире Гөлнара Рәхмәтуллина бәян итте.

Рөстәм Миңнеханов билгеләп үткәнчә, яңа балалар бакчасы ачылу – ул район өчен әһәмиятле вакыйга. Татарстан лидеры искәрткәнчә, 2014 елда республикада 56 балалар бакчасы ачылган иде, быел исә 76ны ачу күздә тотылды. “Иң мөһиме – үзләренең бакчаларыннан балалар канәгать булсын”, - диде ул бу уңайдан.