II Төбәкара интеллектуаль иҗат «Агыйдел» яшьләр форумы үз эшчәнлеген башлый

3-нче август көнне Татарстан Республикасының Актаныш районында II Төбәкара интеллектуаль иҗат «Агыйдел» яшьләр форумы старт алды. Смена 3-9-нчы август аралыгында үтәчәк, интеллектуаль иҗат һәм проект эшчәнлеге белән шөгыльләнүче яшьләрне үзенә берләштерер дип көтелә. Форум Татарстан Республикасының фән һәм мәгариф министрлыгы, Татарстан Республикасының яшьләр иҗтимагый «Сәләт» Фонды тарафыннан чынга ашырыла.
Беренче көн катнашучыларны каршы алу һәм палаткаларга урнаштырудан башланды. Палаткалар шәһәрчеге балалар килешенә Роман Насыбуллин җитәкчелегендәге команда тарафыннан инде 1 ай кала төзелә башлаган иде. Быел «Агыйдел» форумында 200-дән артык бала катнаша, алар арасында 150-се Татарстан Республикасының 14 районыннан булган яшьләр. Калган балалар исә Рәсәйнең төрле төбәкләреннән махсус сайлап алу туры аркылы җыелган. Форумның географиясе дә елдан-ел киңәя: былтыргы Самара, Ульяновск кебек Рәсәй шәһәрләре рәтенә, Удмуртия Республикасы, Киров өлкәсе, Кыргызстаннан килгән балалар да өстәлде.
Көннең икенче яртысы коммуникатив сессиягә – балаларның танышуы, дуслашу, аралашуына багышланган иде. Гомумән алганда, форумның уку-укыту программасы гомум һәм кече сессияләр эшчәнлегенә нигезләнгән. Катнашучылар проект идарәсе һәм креативлык буенча тренинглар курсы үтәчәк. Әлеге уку-укыту программасын Европа Советы һәм Европа программалары тренерлары алып барачак: Наталья Никитина (Түбән Новгород), Наталья Чардымова (Түбән Новогород), Эдуард Оганян, (Түбән Новгород), Юлия Станкевич (Минск), Михаил Бортников (Новосибирск). Форумының башкарма директоры һәм «Сәләт» белем бирү технологияләренең халыкара үзәге җитәкчесе Анна Фельдман сүзләренә караганда, быелгы программа – уникаль, ә форум үзе – мөмкинлекләр дөньясы. «Үзең өчен проектлар белән идарә итү дөньясын ачу мөмкинлеге, юнәлеш алу мөмкинлеге, шәхси һәм һөнәри яктан үсү, тәҗрибә туплау мөмкинлеге... Һәм, әлбәттә, күңелле сәяхәт тә әле!» - дип, белдерде ул.
Беренче кичке чара итеп Форумның оештыру комитеты белән танышу һәм катнашучыларның зур, күңелле концертыннан торды. Биредә балалар җыр-биюгә, сүз сәнгатенә булган осталыкларын күрсәттеләр.
Алга таба уку-укыту программасы тулы көченә эшли башлаячак. Форум барышында һәр катнашучы булган идеяләрен туплап, аның ярдәмендә «шомартып», камилләштереп, бер проект итеп төзергә, аны чынга ашыру юлларын күрсәтергә тиеш була. Әйдаман-тьюторлар һәм тренерлар аларга дөрес юл күрсәтергә, ярдәм итәргә һәрвакыт әзер.