Р.Миңнеханов Зәйдә ресурс үзәген ачуда катнашты

ТР Президенты вазифаларын вакытлыча башкаручы Рөстәм Миңнеханов бүген Зәй районына эш сәфәре кысаларында Зәй политехника көллияте базасында энергетика өлкәсендә ресурс үзәген ачу тантанасында катнашты. 

Биредә энергетика өлкәсендә белгечләр әзерләү буенча уку үзәге булдырылган. Зәй политехника көллияте территориясендә барлык кирәкле җиһазлар белән ике уку-тренировка полигоны урнашкан.

Зәйдә барлыкка килгән ресурс үзәге - республикада беренче һәм әлегә бердәнбер.

ТР Президенты вазифаларын вакытлыча башкаручы тантанада катнашучылар алдында сәламләү чыгышында, 2019 елда Казан һөнәри осталык буенча "WorldSkills Competition" дөнья чемпионатын кабул итә, дип искәртте. Аның сүзләренә караганда, бүген эшче һөнәрләренә аеруча игътибарлы булу мөһим. "Бүген технологияләр бик тиз үзгәрә һәм ресурс үзәге укыту үзәге генә түгел, ә яңадан әзерләү өчен дә яраклы булырга тиеш. Быел без 9 ресурс үзәген тапшырабыз, 2014 елда биш ресурс үзәге тапшырдык. Шулай итеп, якын арада республикада заманча таләпләргә җавап бирерлек 14 ресурс үзәге барлыкка киләчәк. Хәзер техник белгечләр бик кирәк, зәйлеләрне ресурс үзәге ачылу белән котлыйм", - диде ул.

Рөстәм Миңнеханов ТР Премьер-министры урынбасары - республика мәгариф һәм фән министры Энгель Фәттахов, "Сетевая компания" ААҖ генераль директоры Илшат Фәрдиев һәм " Генерирующая компания" ААҖ генераль директоры Раузил Хаҗиев озатуында энергетика полигонын һәм анда куелган яңа җиһазларны карады.

Зәй политехника көллияте бинасында заманча лабораторияләр һәм уку сыйныфлары ремонттан соң булдырылды. Республика бюджетыннан 61,3 млн сум акча бүлеп бирелгән.

Зәй политехника көллияте базасында энергетика өлкәсендә ресурс үзәге ачылышы белән яшьләр ихтыяҗ булган һөнәрләр буенча белем алачак һәм "Агросила Групп" ЯАҖ, «Зәй шикәре» ААҖ, «Сетевая компания» ААҖ, «Генерирующая компания» ААҖ филиалы – Зәй ГРЭС һәм «ТатЭК» ҖЧҖ кебек предприятиеләргә эшкә урнаша алачак.