Татарстанның яшь юл инспекторлары Австриядә уздырылган Европа белем бирү конкурсында җиңеп чыкты

3-6 сентябрь көннәрендә Австрия башкаласы Венада Халыкара автомобиль федерациясенең (FIA) юл йөрү кагыйдәләрен өйрәнү һәм үтәү буенча балаларның XXX Европа белем бирү конкурсы уздырылды. Ярышларда 20дән артык Европа илләре вәкилләре катнашты. Анда Россия данын яшь юл инспекторларының “Безопасное колесо – 2015” бөтенроссия бәйгесендә иң яхшы нәтиҗәләргә ирешкән Татарстан Республикасы һәм Липецк өлкәсе командалары яклады.

Ярышлар практик һәм теоретик өлешләрдән гыйбарәт булды. Катнашучыларның юл йөрү кагыйдәләре буенча белеме, велосипедны фигуралы йөртү кунекмәләре, юлда килеп чыгарга мөмкин булган мәсьәләләрне хәл итүе бәяләнде.

Татарстан командасы вәкилләре Руслан Береснев һәм Идалия Гафарова (Казанның 177нче мәктәбе), Никита Чеканов һәм Анна Лабутина (Казанның 19нчы гимназиясе) конкурсның барлык этаплары йомгаклары буенча I урынга лаек булды. Липецк өлкәсе командасы – II урында. III урынны Латвия командасы яулады.

Искәртеп үтик: әлеге белем бирү конкурсы 1986 елдан бирле уздырыла. Германиядә үткәрелгән беренче конкурста, ярышлар хуҗасыннан тыш, Швейцария, Франция, Австрия һәм Бельгия катнаша. Чараның максаты – балаларның заманча юл шартларында иминлеген тәэмин итә торган күнекмәләрне үзләштерүе, аларны юл йөрү кагыйдәләрен нәтиҗәлерәк өйрәнүгә җәлеп итү, балаларның юлларда куркынычсызлыгын пропагандалау буенча Европа автомобиль клублары эшчәнлеген җәелдерү.

Россия конкурста 2002 елдан бирле катнашып килә. Аның 2006 елда Сербия мәркәзе Белградта үткәрелгәнендә Татарстан Республикасының яшь инспекторлары командасы көмеш медальгә лаек булып, пьедесталга менгән иде.