ТР Премьер-министры Түбән Камада Татарстан кадетлар корпусында булды

Бүген ТР Премьер-министры Илдар Халиков Идел буе федераль округының Түбән Камада урнашкан Татарстан кадетлар корпусында Белем көнен бәйрәм итүдә катнашты.

РФ Президентының Идел буе федераль округындагы тулы вәкаләтле вәкиле урынбасары Алексей Сухов, ТР буенча баш федераль инспектор Ренат Тимерҗанов, ТР хәрби комиссары Сергей Погодин, Түбән Кама муниципаль районы башлыгы Айдар Метшин Белем көненең мәртәбәле кунаклары булды.

1 сентябрьгә кадетлар корпусында 25 метрлы бассейн белән заманча физкультура-сәламәтләндерү комплексы булды.

Алексей Сухов әлеге яңа спорт объекты өчен Татарстан Республикасы һәм Россия Федерациясе Оборона министрлыгына рәхмәт белдерде. Яңа физкультура-сәламәтләндерү корпусы составына гомуми физик әзерлек залы, физкультура-сәламәтләндерү дәресләре өчен бассейн һәм эш-көнкүреш биналары керә. Көрәшләр залында дзюдо, самбо, ирекле көрәш, бокс, армия кул сугышы һәм башкалар буенча тугыз спорт секциясе эшләячәк. Бассейн йөзү һәм су тубы уйнау өчен. Бина төп корпус белән тоташкан.

Кадетларны белем көне белән Татарстан Премьер-министры Илдар Халиков котлады. Ул уку бинасын республикадагы иң яхшыларның берсе дип атады һәм кадетлар корпусына конкурсның бер урынга 25тән артык кеше булуын искәртте. "Нәкъ менә биредә, Түбән Камада, кадетлар корпусы оештыру турындагы карар очраклы гына кабул ителмәде, - дип билгеләп үтте И.Халиков. - Биредә коллектив көчле, чын педагоглар, офицерлар, шәһәр һәм район хакимияте тарафыннан җитди ярдәм күрсәтелә".

ТР Хөкүмәте башлыгы билгеләп узганча, ул кадетлар корпусына икенче тапкыр килгән. "Шатмын дию генә аз, мин таң калдым! Төзүчеләрнең кыска гына вакыт эчендә узган елның беренче сентябренә төп корпусны төзеп өлгертә алуларына да, быелга уку елына бассейн һәм спорт комплексы өлгертүләренә дә", - диде ул. Үз чиратында, Түбән Кама районы башлыгы Айдар Метшин искәрткәнчә, зур спорт объекты "КаДетство" дәүләт проекты һәм РФ Президентының Идел буе федераль округындагы тулы вәкаләтле вәкиле Михаил Бабич һәм Татарстан Президенты вазифаларын вакытлыча башкаручы Рөстәм Миңнеханов ярдәме белән төзелгән.

Мәртәбәле кунаклар кадетлар корпусын һәм яңа физкультура-сәламәтләндерү комплексын карады. "Төзүчеләргә кисәтүләр юк", - дип канәгатьлек хисе белән белдерде Халиков.

Татарстан кадетлар корпусы директоры Айгөл Таипова кунакларга теләген дә җиткерде - балаларга заманча урам спорт мәйданчыклары җитми.

"Россия армиясендә вальс бии белмәгән бер генә офицер да булмаган", - дип искәртте ТР Премьеры аңа кадетларның атнасына ике тапкыр хореография өйрәнүләрен сөйләгәч.

Белешмә өчен. Идел буе федераль округының Түбән Камадагы Татарстан кадетлар корпусында 252 кадет тәрбияләнә.