Дәрвишләр бистәсенең 58нче мәктәбендә кадетлар корпусы ачылды

Бүген Казанның Дәрвишләр бистәсенең 58нче мәктәбендә кадетлар корпусы ачылды. Чарада Наркотиклар әйләнешен контрольда тоту федераль хезмәтенең ТР буенча идарәсе җитәкчесе, полиция генерал-лейтенанты, ТР Дзюдо федерациясе президенты Фаяз Шабаев, Казанның Совет районы хакимияте башлыгы Рөстәм Гафаров, Наркотиклар әйләнешен контрольда тоту федераль хезмәтенең ТР буенча идарәсе җитәкчесе урынбасары, полиция генерал-майоры Борис Тетенищев һәм башкалар катнашты.

Чара бәйрәм линейкасыннан башланды, анда укучылар, аларның әти-әниләре, шулай ук мәртәбәле кунаклар катнашты. Алар өчен Россия һәм Татарстан гимннары яңгырады.

Мәктәптә дүртенче ел кадетлар сыйныфына укучылар кабул ителә. Мәктәптә кадетлар хәрәкәте үсешенә ярдәмне Наркотиклар әйләнешен контрольда тоту федераль хезмәтенең ТР буенча идарәсе һәм Казанның Совет районы хакимияте күрсәтә. Быел "Капиаль ремонт" республика программасы ярдәмендә укучылар мәктәпнең яңа кадетлар корпусында белем алачак.

"Сез - безнең киләчәгебез. Сезнең ничек укуыгызга һәм белем алуыгызга илебез, республикабызның киләчәктә нинди булачагы бәйле. Бүген без яңа бина ачабыз - бу кадетлар өчен Белем көненә бүләк", - дип сәламләде укучыларны Рөстәм Гафаров. Ул мәктәп директоры Гөлнар Коптеловага воркаут белән шөгыльләнү өчен спорт җиһазлары сатып алуга сертификат тапшырды.

Наркотиклар әйләнешен контрольда тоту буенча федераль хезмәтнең ТР буенча идарәсе балалар белән шөгыльләнә, педагогларга һәм мәктәпкә ярдәм итеп тора. Быелдан башлап дзюдо буенча секция ачыла, кадетлар әлеге сугыш сәнгатенә мәҗбүри рәвештә өйрәнәчәк.

"Бүген сез озын юлның нәкъ башында торасыз. Сезгә Наркотиклар әйләнешен контрольда тоту буенча федераль хезмәтнең ТР буенча идарәсе хезмәткәрләренә лаеклы алмаш булырга туры киләчәк. Кадетларга ярдәм иткән өчен Казанның Совет районы хакимиятенә, шулай ук Рөстәм Гафаровка рәхмәт белдерәм, аңа Наркотиклар әйләнешен контрольда тоту буенча федераль хезмәте ТР буенча идарәсенең 10 еллыгы медален, ә 58нче мәктәпкә ТР Дзюдо федерациясе исеменнән мәктәп җиһазлары һәм дзюдо белән шөгыльләнү өчен татами сатып алуга сертификат тапшырырга телим", - дип белдерде Фаяз Шабаев.

"Быелгы уку елында наркоконтроль кадетларының беренче чыгарылышы була. Нәкъ менә быелгы уку елында без беренче сыйныф базасында кадетлар сыйныфы ачабыз. Тиздән тагын 50ләп беренче сыйныф укучысы яшь "аврорачылар" булачак. Мөгаен, иң истәлекле вакыйга - капиталь ремонттан соң заманча кадетлар корпусы ачылудыр", - диде линейкада Гөлнар Коптелова.

Бәйрәм линейкасыннан кунаклар кадетлар корпусында керү ишегенә бәйләнгән кызыл тасманы кисте. Мәктәп директоры Фаяз Шабаев өчен бина буйлап экскурсия үткәрде, кабинетлар һәм спорт залын күрсәтте.

Тантаналы өлештән соң мәртәбәле кунаклар мәктәп традициясе - ишегалдында алмагачлар утыртуда катнашты.