Урта һөнәри белем алучыларга игътибар арта

Татарстанның югары уку йортларында укучылар бик актив. Ә менә урта һөнәри уку йортларында белем алучылар һәрвакыт күләгәдә кала. Бу вәзгыятьне үзгәртү максаты белән, ниһаять, чаралар да уздырыла башлады. Шушы араларда оештырылган урта һөнәри белем бирү учреждениеләре үзидарәсе лидерлар активы мәктәбе узды.
Августта узган Студентларның II белем бирү форумында “Студентлар лигасы”, Татарстанның Мәгариф һәм фән министрлыгы һәм республиканың урта һөнәри белем бирү учреждениеләре арасында өчьяклы килешү төзелгән иде. Шушы вакыйгадан соң лидерлар мәктәбе урта һөнәре уку йортлары белән эшләүнең беренче мисалы булып тора.
Әйтергә кирәк, әлеге чарада Татарстанның 50 урта һөнәри уку йортлары студентлары - барлыгы 150 кеше катнашкан. Алар барысы да үз уку йортларында сайлап алынган. Судентларга төрле мастер-класслар үткәрелгән, респубикабызның төрле тармакларында эшләүче шәхесләр белән очрашулар да узган. Катнашучылар студентлар үзидарәсе эшчәнлеге буенча да шактый белем үзләштергән. Проектлар белән идарә итү, ораторлык сәнгатенә дә өйрәнгәннәр алар, “Студентлар лигасы”, “Россия яшьләр берләшмәсе” вәкилләре белән дә аралашырга өлгергәннәр. Моннан тыш, студентлар идеаль студентлар советын төзеп караган.
- Лидерлар активы мәктәбен тәмамлаганнан соң, студентлар проектларны тормышка ашыру, студентлар үзидарәсен төзү механизмнарын аңлый. Без аларга кешеләрне ничек җәлеп итәргә, гомумән, ничек эшләргә кирәклеген аңлаттык, – дип сөйләде “Interta.ru” хәбәрчесенә “Студентлар лигасы”ның матбугат үзәге җитәкчесе Валерия Манжелиевская.
Аның әйтүенчә, хәзерге вакытта югары һәм урта һөнәри уку йортларында белем алучыларның активлыгын чагыштыру авыр. Вуз студентлары күп нәрсәгә ия, алар өчен мәйданчыклар тудырылган, шактый күп эшләр алып барыла. Ә урта һөнәри белем алучылар өчен бары тик хәзер генә системалы эш башлана әле. Шул сәбәпле, алар мондый мәктәпләрне зур кызыксыну белән кабул итә.
Язма башында урта һөнәри белем бирү учреждениеләрендә укучылар еш кына күләгәдә кала, дип әйткән идек. Чыннан да, урта һөнәри уку йортлары элек респубиканың Мәгариф һәм фән министрлыгына караса, аннары Хезмәт, халыкны эш белән тәэмин итү һәм социаль яклау министрлыгына күчерелгән. Хәзер исә яңадан Мәгариф һәм фән министрлыгына кайтарылган. Мондый күчешләр вакытында ниндидер системалы эш алып бару җиңел түгел. Бәлки хәзер урта һөнәри уку йортлары студентлары игътибарсыз калмас дигән өмет бар.
Студентлар белән очрашуга килгән Татарстан мәгариф һәм фән министры урынбасары Лариса Сулима да: “Бүген махсус урта уку йортлары безнең министрлык карамагында. Шуңа күрә без сезнең белән озак һәм нәтиҗәле итеп эшлиячәкбез, үзебезнең план, проектларыбызны тормышка ашырачакбыз. Сез “Студентлар лигасы”ның тулы хокуклы әгъзалары булачаксыз”, – дип ышандырды.