Россиянең иң эре вузлары гыйльми дәрәҗә бирү хокукына ия булырга мөмкин

Тиздән Россиянең иң эре вузлары үзләре фән кандидаты һәм докторы гыйльми дәрәҗәләрен бирү хокукына ия булырга мөмкин. Бу хактагы закон проекты бүген РФ Хөкүмәте утырышында карала. “Фән һәм дәүләтнең фәнни-техник сәясәте турында”гы законга кертелгән төзәтмәләр моңа кадәр РФ Хөкүмәтенең закон проектлары эшчәнлеге буенча комиссиясе тарафыннан хупланган, дип яза “ТАСС”.

Хәзерге кагыйдәләр буенча, диссертацион берлекләрнең гыйльми дәрәҗә бирү турындагы карары РФ Мәгариф һәм фән министрылыгы тарафыннан, әлеге ведомство карамагындагы Югары аттестацияләү комиссиясе тәкъдиме нигезендә, расланырга тиеш.

“Закон проекты М.В.Ломоносов исемендәге Мәскәү дәүләт университеты, Санкт-Петербург дәүләт университеты һәм башка кайбер югары уку йортларына һәм фәнни оешмаларына мөстәкыйль рәвештә фәннәр кандидаты һәм докторы гыйльми дәрәҗәләрен бирү хокукын тапшыруны күз уңында тота”, – диелә документка теркәлгән материалларда. Бу хокук гыйльми дәрәҗәләрдән мәхрүм итү һәм торгызуга да кагыла.

Фикер алышуга чыгарылган закон проектында әйтелгәнчә, 2016 елның 1 сентябреннән гыйльми дәрәҗәләр бирү хокукына МДУ һәм СПбДУ, 2017 елның сентябреннән башка вузлар һәм фәнни оешмалар ия булачак. Аларның исемлеге РФ Хөкүмәте тарафыннан расланачак.

Утырышта хупланган очракта, закон проекты РФ Дәүләт Думасына тәкъдим ителәчәк.