“Татнефть – Арена” боз сараенда Халыкара укытучылар көненә багышланган бәйрәм тантанасы булачак

Иртәгә 16.00дә Казанның “Корстон” комплексында “Россия ел укытучысы – 2015” бөтенроссия конкурсы финалының II турына йомгак ясалачак. Тантанада ТР Премьер-министры урынбасары – ТР мәгариф һәм фән министры Энгель Фәттахов катнашуы көтелә.

Искәртеп үтик: “Россия ел укытучысы-2015” бөтенроссия конкурсының финалы 24 сентябрьдән 2 октябрьгә кадәр Казанда үткәрелә. Бәйгенең йомгаклау сынаулары башкаланың 177нче мәктәбендә уза.

Иртәгә буласы чарада исә Россиянең иң яхшы 5 укытучысын игълан итү күздә тотыла. Алар сынауны конкурсның 4 октябрьдә Мәскәүдә уздырылачак йомгаклау өлешендә дәвам иттерергә тиеш була.

3 октябрьдә 13.00дә Казанның “Татнефть – Арена” боз сараенда ТР Премьер-министры Илдар Халиков катнашында Халыкара укытучылар көненә багышланган бәйрәм тантанасы була.

“Россия ел укытучысы 2015” дигән дәрәҗәле исем иясе 5 октябрьдә Мәскәүнең Дәүләт Кремль сараенда үткәреләчәк Халыкара укытучылар көненә багышланган бәйрәм тантанасында игълан ителер дип көтелә.