Казанның педагогик хезмәт ветераннары өчен бәйрәм концерты була

7 октябрь көнне сәгать көндезге 2дә Казанның Мәгариф хезмәткәрләре йортында, Укытучылар көне уңаеннан, педагогик хезмәт ветераннары өчен ел саен оештырыла торган бәйрәм концерты була. Бәйрәм, традиция буенча, шәһәрнең педагог-ветераннар советы белән берлектә үткәрелә.

Концерт программасында – Әүхәдиев исемендәге Казан дәүләт музыка көллияте (училищесы) студентлары Антон Косарев һәм Екатерина Макарова, композитор, музыкант һәм педагог Виталий Харисов, узган елда үткән “Мистер ИКС” бәйгесендә җиңүче, музыка укытучысы Сергей Гребенкин, инструментчы Дамир Габдрахманов чыгышы, һәм шулай ук шәһәрнең яшь башкаручылары, сүз сәнгате осталары чыгышы. “Сәйдәш” бию театры солисты Альберт Әхмәтов үзенең дәртле биюләре белән чыгыш ясаячак.

Концертның шәрәфле кунаклары арасында – Татарстанның атказанган укытучылары. Концертны республиканың атказанган артисты Лилия Аппакова алып барачак, дип мэрия сайты аша хәбәр итәләр Мәгариф хезмәткәрләре йортыннан.