Мамадыштан Гөлнара Шагивалеева – “Россия педагог-психологы-2015” Бөтенроссия конкурсы номинанты

25 нче сентябрьдән 5 нче октябрьгә кадәр Сочи шәһәрендә “Өйрәтү. Тәрбия. Үсеш - 2015” IX Бөтенроссия психологлар форумы узды. 5 дискуссион мәйданчыкта психологлар бүгенге көндә актуаль булган темаларга фикер алыштылар.
“Психологиядә яңа технологияләр” дигән семинарда психологларның авторлык программалары тәкъдим ителде. Форум кысаларында мастер-класслар үткәрелде.
“Психологик белем бирүдә проблемалар һәм үсеш” исеме астында фәнни-гамәли конференция берничә юнәлештә узды.
Форум программасына “Педагог-психологларның һөнәри осталыгы -2015” Бөтенроссия конкурсы да кертелгән иде. Конкурсның максаты Россия психологларының һәнәри һәм иҗади үсешен, психологик хезмәтнең дәрәҗәсен күтәрү һәм төрле дәрәҗәдәге уку йортларында психологларның эш тәҗрибәсен тарату.
Конкурста Россия Федерациясенең төрле тәбәкләрендә җиңү яулаган 32 педагог-психолог катнашты. Республикабыз данын якларга Мамадыш шәһәренең 3 нче санлы мәктәбе педагог-психологы Шагивалеева Гөлнара Камил кызы барды. Аңа катнашучы шаһәдәтнамәсе һәм “Үзенчәлекле стиль һәм стандарт булмаган якын килү” номинациясендә катнашучы грамотасы бирелде.
Мамадыш муниципаль районының башлыгы Анатолий Петрович Иванов “Россия психологлары федерациясе» оешмасы конкурсында катнашучыларга ярдәм күрсәткәне өчен рәхмәт хаты белән бүләкләнде.