Казанда XX Халыкара астрономия олимпиадасы ачылды

Бүген Казан ратушасында XX Халыкара астрономия олимпиадасына старт бирелде. Ачылу тантанасында ТР мәгариф һәм фән министрының беренче урынбасары Андрей Поминов, Идел буе федераль университетының Физика институты директоры Сергей Никитин, Россия Фәннәр академиясенең астрономия буенча фәнни советы гыйльми секретаре, Халыкара астрономия олимпиадасы рәисе Михаил Гаврилов һәм башкалар катнашты.
23 нче октябрьгә кадәр дәвам итәчәк олимпиадада 13 илдән - Румыния, Македония, Корея, Һиндстан, Тайланд, Кытай, Чехия, Болгария, Италия, Әрмәнстан, Казакъстан, Швеция һәм Россиядән астрономия серләрен яхшы белгән 65 укучы катнаша. Олимпиадада Россия җыелма командасы составына Бөтенроссия олимпиадасы җиңүчеләре һәм призерлары булган 6 укучы кергән. Алар арасында Татарстан вәкиле - Казан федераль университетының IT-лицеенда 9 нчы сыйныфта белем алучы Игорь Никоноров бар.
Ярышлар өч турда узачак: теоретик, күзәтүчелек һәм гамәли этаплар. Күзәтү туры КФУның В. П. Энгельгарт исемендәге астрономия обсерваториясендә узачак.
Андрей Поминов олимпиадада катнашучыларга мөрәҗәгать итеп: “Без сезне Татарстанда, меңьеллык Казанда сәламләүгә шатбыз. Республикабыз, башкалабызның астрономия өлкәсендә казанышлары шактый. Казанда астрономия белеме 200 дән артык еллык тарихка ия. Астрономия буенча юбилей олимпиадасын Казанда уздыру очраклы түгелдер дип саныйбыз. Бүген бирегә астрономия фәне белән мавыгучы иң сәләтле балалар җыелган”, - дип министрның беренче урынбасары укучыларның барчасына уңышлар теләде.
Сергей Никитин олимпиадада катнашучыларны КФУ ректоры Илшат Гафуров исеменнән сәламләде. Ул чыгышында Казан университетының күркәм традицияләре, бөек галимнәрнең фән өлкәсендәге казанышлары турында бәян итте. Россиядә беренче астрономия кафедрасының Казан университетында ачылуын билгеләп узды. “Казанның астрономнар мәктәбе дөнья күләмендә яхшы таныш”, - дип белдерде Никитин.
Шәрәфле кунакларның чыгышыннан соң, тантаналы төстә XX Халыкара астрономия олимпиадасында катнашучы илләрнең әләмнәре чыгарылды.
Ачылу тантанасы Татарстанның иҗат коллективлары чыгышлары белән үрелеп барды.
Олимпиада программасы кысаларында, катнашучылар өчен Казан буенча экскурсияләр оештырылачак. Укучылар М. Җәлил исемендәге Татар дәүләт опера һәм балет академия театрына, КФУга, Казан Кремленә, Зөя (Свияжск) утрау-шәһәрлегенә сәяхәт кылачак. 22 нче октябрь көнне халыкара олимпиаданың ябылу тантанасы узачак, һәм җиңүчеләр бүләкләнәчәк.