Татарстанда татар теле һәм әдәбияты укытучылары өчен регионара семинар узды

2015 нче елның 15-17 нче октябрендә Балык Бистәсе районында регионара семинар уздырылды. Семинар эшендә Төмән һәм Ульяновск өлкәсе делегацияләре катнашты.
Семинарда катнашучыларны Татарстан Республикасы Мәгариф һәм фән министрлыгының милли мәгариф идарәсе башлыгы Әхмәтҗанова Л.М., Бөтендөнья татар конгрессының беренче урынбасары Шакиров Д.Ф.,Балык Бистәсе районының мәгариф идарәсе бүлеге җитәчесе Садиков И.М., Ульян өлкәсенең милли-мәдәни автономиясе рәисе Сафин Р.Ф. сәламләде.
Семинарда катнашучылар Балык Бистәсе районы мәгариф учреждениеләре эшчәнлеге белән танышты. Югары Тегермәнлек һәм Күгәрчен гомуми белем бирү мәктәбендә күрсәтелгән мастер-класслар, ачык дәресләр һәм сыйныфтан тыш чаралар делегация тарафыннан югары бәяләнде.
16 нчы октябрь көнне делегация Татарстан Республикасы Арча муниципаль районының Г.Тукай исемендәге Арча педагогия көллиятендә “Милли мәгариф системасын камилләштерү, үстерү” темасына багышланган түгәрәк өстәлдә катнашты. Шулай ук әлифба музеена экскурсия оештырылды. Семинар кунаклары Яңа Кырлай авылы жирлегендә урнашкан урта мәктәптә дә булдылар.Кунакларны мәгариф идарәсе җитәкчесе Дәүләтбаев З.М. озатып йөрде, мәктәпнең уку һәм тәрбия эше, заманча җиһазландырылган татар теле һәм әдәбияты кабинеты, укучылар кулы белән ясалган кул эшләре күргәзмәсе белән таныштырды. Г.Тукайга багышланган концерт та кунакларда бик җылы тәэсир калдырды. Шулай ук кунаклар Кырлай әдәби-мемориаль музей комплексы белән дә таныштылар.