Казанда «Вверх!» конкурсында җиңүчеләрне бүләкләделәр

Бүген ТР Хөкүмәте йортында «Вверх!» алтынчы республикакүләм конкурсына йомгак ясалды. Конкурста җиңүчеләрне һәм призерларны игълан итүгә багышланган тантаналы чарада ТР Премьер-министры урынбасары Васил Шәйхразиев, ТР яшьләр эшләре һәм спорт министры Владимир Леонов, ТР ҮСК рәисе урынбасары Валентина Каменькова катнашты.

«Вверх!» республикакүләм конкурсы 2009 елдан алып ел саен ТР Яшьләр иҗаты академиясе белән ТР Яшьләр эшләре һәм спорт министрлыгы тарафыннан үткәрелә. 10-16 октябрьдә республиканың 9 муниципаль районыннан 42 яшь лидер кадрлар резервына керү хокукы өчен көрәште. Алар “Иҗади тәкъдим итү”, “Министрның яшь ярдәмчесе мөрәҗәгате”, “Министрлык матбугат хезмәте”, “Социаль проектны яклау”, шулай ук “Министрлык хезмәткәре вакантлы вазифасына әңгәмә” дип аталган конкурс этапларын уздылар. Бүген проект практикасына һәм Татарстан министрлыгында һәм ведомствосында стажировкага юллама алучыларның исемнәре игълан ителде.

Конкурсның башкаручы директоры Андрей Петухов сөйләвенчә, быел конкурста катнашу өчен Татарстанның 18 муниципаль районыннан 149 кеше гариза биргән. Алар арасыннан 42 кеше финалга чыкты, алар - вузлар һәм ссузлар студентлары, яшьләр.

“5 елда “Кадрлар резервы” проектын гамәлгә ашыру кысаларында без 1400 кешене өйрәттек. Алар 38 проект һәм социаль акцияләрне чынга ашырды. Бүген проектта катнашучылар хакимиятнең дәүләт һәм муниципаль органнарында эшиләр. 100 дән артык кеше җәмәгать берләшмәләрен җитәкләде, 50 дән артык резервист коммерция һәм сәнәгать секторларына эшкә юнәлде, 60 тан артык кеше мәгариф системасында эшли”, - дип билгеләп үтте Андрей Петухов.

Финалга чыгучыларны чарада ТР Премьер-министры урынбасары Васил Шәйхразиев котлады. Ул республикада “яшьләрдә мөмкин кадәр иртәрәк лидерлык сыйфатларын ачыклау һәм аларны үстерү мөмкинлеге бирү өчен барысы да эшләнелүе”нә игътибарны юнәлтте. Бу юнәлештә эш мәктәптән үк башлана. “Яшьләрнең 1 нче курстан ук студент тормышына кереп китү мөмкинлеге бар, ул – студсовет, КВН, спорт, җәмәгать эшләре. Шул ук вакытта яшьләр парламентаризмы элементы. Болар барысы да җаваплылык һәм аралашуның башка дәрәҗәсен бирә. Безнең төп бурыч – муниципаль һәм дәүләт хезмәтенә, эшмәткәрлеккә кадрлар әзерләү”, - дип ышандыра Шәйхразиев.

ТР Премьер-министры урынбасары җиңүчеләрне бүләкләүдә дә катнашты.

“Сезнең һәрберегез талантлы һәм аны шундый конкурсларда үстерү мөһим”, - диде ТР яшьләр эшләре һәм спорт министры Владимир Леонов. “Һәрвакыт алга һәм югарыга омтылыгыз”, - дип теләде ул һәм министрыкның Мактау грамоталарын һәм Рәхмәт хатларын тапшырды.

Моннан тыш, бүгенге тантанада конкурсның сайлап алу турыннан кала, “Кадрлар резервы” республикакүләм проектында һәм “Политзавод” проектында катнашу өчен сертификатлар тапшырылды.

Искәртеп үтик: 26 октябрьгә булган мәгълүматларга караганда, “Политзавод” проекты сайтына 300 чамасы заявка килгән. Проектны “Бердәм Россия” БСП ТТБ, “Бердәм Россия”нең Яшь гвардия” Татарстан штабы һәм “ТР Иҗади яшьләр академиясе” Төбәк иҗтимагый оешмасы гамәлгә куя.

“Бердәм Россия” партиясенең төбәк Башкарма комитеты җитәкчесе Андрей Кондратьев “Политзавод” проектының актив этабы башлануын белдерде.