Казанда “Калфаклы сандугач” VIII төбәкара фестиваль-конкурсы уза

2015 елның 30 октябрендә татар халкының күренекле композиторы, Татарстанның Г.Тукай исемендәге дәүләт бүләге иясе, Татарстанның халык, Россиянең атказанган артисткасы Сара Садыйкованың туган көне уңаеннан татар халкының җыр һәм музыка сәнгате өлкәсендә якты эз калдырган әлеге мәшһүр сәнгатьченең исемен мәңгеләштерү максатыннан Сара Садыйкова исемендәге төбәкара ачык фестиваль-конкурс үткәрелә. Фестиваль-конкурс Казанның Киров районында урнашкан 4 нче татар гимназиясендә быел сигезенче  мәртәбә узачак.
Әлеге чарада Татарстан Республикасы гомуми белем бирү оешмалары, музыка һәм сәнгать мәктәпләре укучылары үзләренең иҗади мөмкинлекләрен күрсәтә ала. Агымдагы елда 158 укучы яки коллектив конкурста катнашу теләген белдерде. Конкурсантлар арасында Австралиянең Аделаида шәһәреннән татар-башкорт мәктәбенең «Шатлык» вокал ансамбленең чыгышы яздырылган видеоязма катнашачак.