Рөстәм Миңнеханов Россиядәге яңа мәктәпләр төзү буенча селектор киңәшмәсендә катнашты

Бүген Россия Федерациясе Хөкүмәте Рәисе Дмитрий Медведев 2016 – 2025 елларга «Россия Федерациясе субъектларында гомуми белем оешмаларында яңа урыннар булдыруга ярдәм» программасы буенча селектор киңәшмә уздырды. Киңәшмә «Горки» (Мәскәү өлкәсе) резиденциясендә узды. Видеоконференцэлемтә режимындагы киңәшмәдә федерация субъектлары башлыклары катнашты.
Татарстан ягыннан чарада Татарстан Республикасы Президенты Рөстәм Миңнеханов катнашты. «Бүген һәр дүртенче мәктәп ике яисә өч сменада эшли. Күп кенә биналар бик искергән, кайберләре, асылда, дәресләр уздырырга яраксыз. Шулай итеп, мәктәпләрнең күбесенә капиталь ремонт кирәк, җиһазларын алмаштырырга яисә яңа мәктәпләр төзергә», - диде Дмитрий Медведев. Аның сүзләренчә, бөтен ил буйлап яңа мәктәпләр салу мәсьәләсе – киң күләмле проект.
Россия Федерациясе Хөкүмәте Рәисе искәрткәнчә, соңгы берничә елда ил җитәкчелеге, төбәкләр белән бергә, «Бердәм Россия» сәяси партиясе катнашында мәктәпкәчә мәгариф оешмаларын яңарту белән шөгыльләнде, максат 2016 елга 3 яшьтән алып 7 яшькә кадәрге барлык балаларны да бакчаларда урыннар белән тәэмин итү иде. «Бу программа иң уңышлыларның берсе булды, – диде ул. – Бүген балалар бакчаларына чират проблемасы100 процент дәрәҗәсендә хәл ителгән диярлек. Шулай да, без яңа балалар бакчаларына йөрүче бу балалар озакламый мәктәпләргә китәчәк. Быел гына да беренче сыйныфка баручылар саны, былтыргыга караганда, 145 меңгә күбрәк, тагын 10 елдан мәктәп балаларының гомуми саны 3,5 млн булачак – бу бик зур сан. Алар әйбәт һәм заманча уку йортларында укырга тиеш».