Үз эшен яратучы укытучы

“Бу авылдан китмәс идем”, – ди Әтнә районының Бәрәскә мәктәбендә  физкультурадан белем бирүче Радик Шәрәфиев. Югыйсә Бәрәскә аның өчен туган авыл да түгел. Әлеге мәктәпкә Шашы авылына көн саен утыз чакрым араны узып килә егет.  Кайсы ягы белән әсир иткән соң аны ул авыл?
Радик Казандагы Олим­пия резервы училищесын, КФУның физкультура бү­леген тәмамлаган. Грек-рим, билбау көрәше буенча спорт остасы исеменә ия. Көрәш белән икенче сыйныфтан ук шөгыль­ләнә. Ә Бәрәскә мәктә­бендә дүр­тенче елын укыта. “Мәктә­бе­бездә һәр укучы нинди дә булса спорт төре буенча сәләтле. Аларның өметле күзләренә карыйм да, яр­дәм итәсем килә. Китсәм, ярышларга кем әзерләр, дип уйлап куям”, – ди ул, укучыларны яратуын белдереп. Шулай да аны, таләпчән, диләр. Әгәр балалар чараларда турникта дөрес тартылмаса, күнегүләрне төгәл үтә­мәсә, балларын кисә­чәген алдан искәртеп куя. Башкача күнегүләрнең файдасы булмаячак. Укучылар белән хаталар өстендә  эш­ләргә дә вакыт калдыра. Балалар бигрәк тә дәрес­ләрнең кышкы урам­да узуын көтеп ала. Чаңгыда, тимераякта шуып мәш киләләр. Яз җит­кәндә дә: “Әйдә, абый, чаңгы шуабыз”, – диләр икән.

 Бәрәскә мәктәбе хоккей буенча алдынгылыкны бирми. Бадминтон, футбол, татарча көрәш, кул көрәше буенча да сынатмыйлар. Кызлар мини-футбол белән мавыга. Район күләмендә узган чарада өченче урынны алганнар. Җәй көне яңа стадион төзелгәч, кызыксынулары тагын да арткан. Чирәмне кар капласа да, күңелләре һаман шунда тарта. Ярышлар мәсьә­лә­сенә килгәндә,  кайчак кызларны шоколад биреп тә юмаларга туры килә аңа. “Абый, шоколад  бир­сәгез, ярышка барам, бары яхшы урын гына алып кайтам”, – дип шаярта икән Рәзилә укытучы абыйсын. Чыннан да, сү­зендә тора: теннис, бадминтон ярышларында беренче урынны алып кайта. Югары сыйныф уку­чы­ла­рының имтиханнарга әзер­ләнүе дә кайчак ярыш­ларга бару өчен киртә булырга мөмкин. Бу очракта мәсьәләне мәктәп җитәк­челеге белән хәл итәргә туры килә. “Интернет заманы булгач, ба­лаларның укуга омтылышлары азрак. Аларны кызыксындыра белергә кирәк. Шуңа күрә уеннарны  мавыктыргыч итеп оештырырга тырышам”, – ди укытучы.

Балалар ГТО нормалары тапшыруның да авырлыгын күрмиләр. Физик тәр­бия буенча уңышка ирешкән­нәрне Сабантуйда бүләк­лиләр. Авыл җир­леге башлыгы да ярдәм итеп тора. “Ике ел элек ГТО кер­телгәч, сәламәт­леге буенча махсус төр­кемнәрдә шө­гыль­лә­нүче балалар күп иде. 85 уку­чының нибары 43е генә әлеге нормативларны тапшырды. Хәзер  балаларда ГТО бирү теләге арта бара. Һәркемнең күкрәк билгесе аласы килә. Шул ук вакытта аларның  медицина күрсәт­кечлә­ренең яхшыруы да күзә­телә. Турникта тартылу, озынлыкка си­керү, кыска арага йөге­рү буенча  проблемалар юк. Тик менә 1 чакрымга йөгергәндә хәлләре тиз бетә. Дәрес­ләрне уздыру өчен спорт җиһазлары җитә”, – ди Радик Шә­рәфиев.