Якшәмбе мәктәпләре хакында
Республикада якшәмбе мәктәпләренең саны утыз бишкә җитте һәм алар елдан-ел арта бара. Шулай да чын мәгънәсендә, җисеме дә мәктәп атамасына туры килгәне берәү, ул Казанда урнашкан. Калганнары аерым бүлекләр булып этник культуралы мәктәпләрдә, мәдәният йортлары каршындагы түгәрәкләрдә эшли.Татарстан Мәгариф һәм фән министрлыгының милли мәгариф идарәсе башлыгы Лилия Әхмәтҗанова сүзләренә караганда, әлеге мәктәпләр тел өйрәтү белән генә чикләнми, үз халкының йола-гадәтләрен, сәнгать-мәдәниятен, тарихын өйрәнүне дә күздә тота.
“Билгеле булганча, бездә 170тән артык милләт вәкиле яши. Әлбәттә, аларның барысына да мәктәптә үз ана телләрен өйрәтү мөмкин түгел. Әлеге бурыч якшәмбе мәктәпләренә йөкләнә. Узган ел аларда 19 халыкның теле өйрәнелсә, хәзер бу күрсәткеч 23кә җитте. Исеменнән күренгәнчә, мәктәпләр күпчелек якшәмбе көнне яисә кич белән эшли. Алар барысы да өстәмә белем бирү системасы кысаларында укыта. Монда эшләүчеләрнең дә укытучы белеме булу шарт. Моннан тыш, мәктәпләрнең укыту программалары, эш планнары Мәгариф министрлыгының күзәтүе астында”, – диде ул якшәмбе мәктәпләренә багышланган фестивальдә.
2020 елга кадәр исәпләнгән төрле милләтләрнең ана телен саклау программасы кысаларында әлеге белем бирү оешмаларына төрлечә ярдәм күрсәтелә. Якшәмбе мәктәпләре компьютерлар белән тәэмин ителә, алар өчен Мәскәүдән махсус әсбаплар кайтарыла. Шулай ук җәй айларында күпмилләтле балалар лагерьлары оештырыла. Һәр елның маенда якшәмбе мәктәпләренең слеты уздырыла. Монда укучылар белән бергә укытучылар да килә, алар мастер-класслар үткәреп, тәҗрибә уртаклаша.
Әлеге чараларның дәвамы булган якшәмбе мәктәпләренең фестивале күптән түгел Казанның Халыклар дуслыгы йортында үткәрелде. Беренче мәртәбә уздырылуына карамастан, финалда республиканың 11 районы катнашты. Казанның күпмилләтле якшәмбе мәктәбе директоры Майя Хухунашвили хәбәр итүенчә, конкурс хореография, вокал һәм халык иҗаты юнәлешләрендә үтә. Бәйгедә төрле яшьтәге, төрле милләт вәкилләре катнаша һәм алар һәрберсе сәхнәдә үз моңын, милли йолаларын чагылдырырга омтыла.Фестивальнең җиңүчеләре итеп, Казанның “Сакартвело” грузин бию ансамбле, Яшел Үзән “Камертон” вокал төреме һәм Алексеевск “Сеспель” чуаш балалар фольклор ансамбле билгеләнде. Әлеге төркемнәр диплом һәм акча сертификатлары белән бүләкләнде.