Казанда башлангыч сыйныф укучыларының белеме тикшереләчәк

Казан мәктәпләрендәге башлангыч сыйныф укучылары Бөтенроссия тикшерү эшләрендә катнашачак. Россия мәгариф һәм фән өлкәсендә күзәтчелек буенча федераль хезмәт тарафыннан расланган расписание нигезендә, Бөтенроссия тикшерү эшләре апробациясе бүген, ягъни 1 декабрьдә старт ала. Тикшерүне шәһәрнең 20 мәктәбеннән меңнән артык 4 нче сыйныф укучысы узачак.

Россия мәгариф һәм фән өлкәсендә күзәтчелек буенча федераль хезмәт ачыклык керткәнчә, Бөтенроссия тикшерү эшләре – дәүләт йомгаклау аттестациясенең тиңдәше. Алар мәктәп һәм төбәк дәрәҗәләрендә үткәрелә. Аның аша Россия Федерациясенең 80 төбәгендәге барлыгы 21 мең мәктәбенең 750 мең башлангыч сыйныф укучысы узарга тиеш була.

Апробация 3 этапта уздырыла. 1 декабрьдәге беренче этапта укучыларның рус теленнән белемнәре тикшерелә – мәктәп укучылары диктант яза. 3 декабрьдә шулай ук рус теленнән белемнәр тикшереләчәк, балаларның грамоталылыкларын, рус әдәби теле системасы нигезенең белемнәре тикшереләчәк.

Өченче этап 8 декабрьгә билгеләнгән, анда балаларның математика буенча белемнәре тикшерелә.

Җыеп кына әйткәндә, барлык катнашучыларга да рус теленнән 16 бирем һәм математикадан 12 бирем эшләргә туры киләчәк.

Сынау эшләренең һәрберсе 45 минутлык 1 дәрескә исәпләнгән. Эшләр федераль дәрәҗәдә әзерләнгән биремнәр буенча эшләнә һәм бердәм критерийлар буенча тикшерелә.