Казанда балалар бакчаларына йөрү өчен 13 мең нәнигә юллама бирелгән

Казандагы балалар бакчалары яңа уку елында 13 мең бала кабул итәчәк, шуларның 9 меңе – өч яшьлек балалар. 1,5 яшьтән алып 3 яшькә кадәрге балаларны төркемнәргә туплау башланды. Гомумән алганда, балалар бакчаларына 66 мең нәни йөриячәк. Бу турыда бүген шәһәр Мэриясендә үткән эшлекле дүшәмбе утырышында Казанның Мәгариф идарәсе җитәкчесе Илсур Һадиуллин җиткерде.

Идарә җитәкчесе сүзләренчә, шәһәрнең зур микрорайоннарында 8 мең урынга исәпләнгән 7 мәктәп төзү планлаштырыла. “Хәзерге вакытта Совет районында 1224 урынга исәпләнгән мәктәп төзелә”, - дип җиткерде И.Һадиуллин. Аның сүзләренчә, объектны кулланышка тапшыру вакыты – 2017 елның 1-нче сентябре.

Идарә җитәкчесе балалар учреждениеләрен яңа уку елына әзерләү эшләре турында да сөйләде. 68 мәктәп һәм 137 балалар бакчасында төзекләндерү эшләре башкарылачак икән. “Белем бирү учреждениеләрен яңа уку елына әзерләп тапшыру өчен Казанның мәгариф системасында кирәкле ресурслар бар. Куелган бурычлар үтәләчәк”, - дип ассызыклады И.Һадиуллин.