Казанда туган теле рус булмаган мәктәп укучылары арасында рус теле буенча III халыкара олимпиада башлана
Иртәгә, ягъни 4 июньдә Казандагы Халыклар дуслыгы йортында туган теле рус булмаган мәктәп укучылары арасында рус теле буенча III халыкара олимпиаданы ачу тантанасы була.
Россиядә бу төр олимпиада беренче мәртәбә 2014 елда ТР Президенты Рөстәм Миңнеханов башлагычы белән үткәрелгән иде. Бәйге, рус телен укытуны камилләштерү, сәләтле һәм булдыклы укучыларны, шулай ук иҗади эшләүче укытучыларны барлау һәм кызыксындыру максатыннан, оештырыла.
Анда Россия Федерациясе һәм БДБ субъектларында яшәүче быел 8нче һәм 10нчы сыйныфларны тәмәмлаган укучылар катнаша. Рус теле буенча халыкара олимпиада 2 турда үткәрелә. Беренче тур – сайлап алу, ул онлайн тест эшләү режимында уздырылды. Бәйгенең бу өлешендә 3,5 меңләп укучы катнашты. Шулардан 200ләбе сынауны Казанда уздырыла торган йомгаклау өлешендә дәвам иттерәчәк.