Мәгариф турында закон проекты Дәүләт думасы тарафыннан яз көне кабул ителүгә әзер

Россия Федерациясе мәгариф һәм фән министры Андрей Фурсенко мәгариф турында закон проекты яз көне Дәүләт думасы тарафыннан кабул ителү өчен әзер һәм инде 2013 елның гыйнвар аеннан гамәлдә булыр дип саный. Мәгариф һәм фән министрлыгы әзерләгән “Россия Федерациясендә мәгариф турында” закон проекты 1992 һәм 1996 елларда кабул ителгән ике төп законны – “Мәгариф турында” һәм “Югары һәм вуздан соң һөнәри белем алу турында” законнарын алыштырачак. Анда белем бирүнең һәр баскычы, шул исәптән мәктәпкәчә белем, башлангыч, урта һәм югары һөнәри белем, өстәмә белем бирү буенча да нормалар язылачак. Сишәмбе көнне үткәрелгән Мәгариф һәм фән министрлыгы коллегиясе утырышында Фурсенко: “Әгәр аның 2013 елның 1 нче гыйнварында үз көченә керүен телибез икән, ул вакытта закон проекты язгы сессиядә каралырга тиеш, әгәр көзге сессиядә каралса, аның гамәлгә кертелү вакыты кичектереләчәк”, - диде. Министр сүзләренә караганда, закон зур әһәмияткә ия, шуңа күрә җитди җәмәгатьчелек ярдәмендә кабул ителергә тиеш. “Документ турында гомер буе фикер алышып утыру мөмкин түгел, аны кабул итү өчен үз өстебезгә җаваплылыкны алырга кирәк. Документның сыйфаты аны яз көне кабул итү дәрәҗәсендә”, - дип билгеләп үтте ведомство башлыгы. Мәгариф һәм фән министрлыгы мәгълүматларына караганда, мәгариф турында закон проекты Россия Федерациясенең 46 субъекты белән килешенгән, 34 субъект аңа төзәтмәләр кертү турында тәкъдимнәрен керттеләр. Югары икътисад мәктәбе ректоры Ярослав Кузьмин үз чиратында законны кабул итәр алдыннан 10 төзәтмә кертергә кирәген әйтте. Алар арасында укытучыларның хезмәт хакларын, студентларның стипендияләрен күтәрү мәсьәләләре бар. Ректор тәкъдиме буенча алар яшәү минимумына якын булырга тиешләр.

“Идеологик яктан караганда, проектта каршылыклар юк. Мин санап үткән төзәтмәләр законда яисә закон актларында кабул ителүгә лаеклы”, - дип белдерде Кузьминов.